కెనడాలోనూ భారతీయులపై జాతివివక్ష దాడులు

ఆస్ట్రేలియాలో గత కొన్ని రోజులుగా భారతీయ విద్యార్థులను లక్ష్యంగా చేసుకొని జాతివివక్ష దాడులు జరుగుతున్నట్లు మీడియాలో పెద్దఎత్తున ప్రచారం జరుగుతున్న నేపథ్యంలో.. కెనడాలోనూ ఈ తరహా దాడి జరగడం ప్రాధాన్యత సంతరించుకుంది. కెనడాలో భారత బృందంపై జరిగిన జాత్యహంకార దాడికి సంబంధించి నలుగురు కెనడా పౌరులను అక్కడి అధికారిక యంత్రాంగం అరెస్టు చేసింది.

వాంకోవర్ శివారుల్లోని లాంగ్లే ప్రాంతంలో కొందరు భారతీయులపై వీరు జాతివివక్ష ప్రదర్శించినట్లు పోలీసులు తెలిపారు. ఆరుగురు భారత సంతతి వ్యక్తులు వారాంతంలో టెన్నిస్ ఆడుతుండగా, నలుగురు కెనడా పౌరులు వారి వద్ద జాత్యహంకార వ్యాఖ్యలు చేశారు. అంతేకాకుండా నిందితుల్లో ఓ వ్యక్తి ఫెన్స్ బోర్డును భారత టెన్నిస్ ఆటగాళ్లపై విసిరాడు. అది ఒకరికి తలపై తగిలింది.

అక్కడి నుంచి నిందితులు పరారవుతూ బాధితుల వస్తువులను కూడా తీసుకొని వెళ్లారు. భారతీయులపై దాడి చేసిన నలుగురు కెనడా పౌరులను అనంతరం పోలీసులు అరెస్టు చేశారు. వీరివద్ద నుంచి భారతీయుల వస్తువులను స్వాధీనం చేసుకున్నారు. నిందితులపై మంగళవారం వివిధ అభియోగాలతో కేసు నమోదు చేశామని కెనడా పోలీసులు వెల్లడించారు.