కన్నబిడ్డను చిత్ర హింసలకు గురి చేయడమే కాకుండా, ఆ చిన్నారి సంరక్షణ పట్ల నిర్లక్ష్యం వ్యవహరించిన ఒక మహిళకు ఆస్ట్రేలియా కోర్టు ఆరేళ్ళ జైలు శిక్ష విధిస్తూ తీర్పు ఇచ్చింది. దక్షిణ ఆస్ట్రేలియా సుప్రీంకోర్టు జడ్జి క్రిస్ కౌరకిస్ ఈ శిక్షను ఖరారు చేశారు. నవ మాసాలు మోసి కన్న బిడ్డ పెంపకం పట్ల నిర్లక్ష్యంగా వ్యవహరించడమే కాకుండా, ఈ చిన్నారిని ప్రతి రోజూ కొడుతూ చిత్ర హింసలకు గురి చేసేందని ప్రాసిక్యూటర్ జిమ్ పీర్సె కోర్టు దృష్టికి తీసుకెళ్లారు.
ఈ విషయాన్ని 2008 జూన్‌లో గుర్తించి ఆ చిన్నారిని తమ రక్షణలోకి తీసుకున్నట్టు తెలిపారు. అంతేకాకుండా, చిన్నారి ప్యాకెట్ మనీ ఖర్చులను కూడా సిగరెట్లు, ఇతర వ్యసనాలకు ఖర్చు చేసేదని ప్రాసిక్యూటర్ తెలిపారు. దీంతో ఆ మహిళకు వివిధ సెక్షన్ల కింద ఆరేళ్ళ జైలుశిక్ష విధిస్తూ కోర్టు తీర్పు ఇచ్చింది.