ఐదేళ్ల గరిష్ట స్థాయికి చేరిన జపాన్ నిరుద్యోగం

జపాన్‌లో నిరుద్యోగ రేటు ఐదేళ్ల గరిష్ట స్థాయికి చేరుకుంది. రెండో ప్రపంచ యుద్ధం తరువాత అత్యంత దారుణమైన అంతర్జాతీయ ఆర్థిక సంక్షోభం ప్రస్తుతం ప్రపంచ దేశాలను పట్టిపీడిస్తున్న సంగతి తెలిసిందే. గత కొన్ని నెలలుగా ఆర్థిక మాంద్యం కారణంగా జపాన్ కంపెనీలు తీవ్రంగా నష్టపోయాయి. దీంతో ఆయా కంపెనీలు మనుగడ కోసం ఉద్యోగులపై వేటు వేశాయి.

జపాన్ కంపెనీలు ఉద్యోగాలు తగ్గించివేయడంతో దేశంలో నిరుద్యోగ రేటు ఐదేళ్ల గరిష్ట స్థాయికి చేరుకుందని తాజా గణాంకాలు వెల్లడించాయి. ఇదిలా ఉంటే గత 16 నెలల్లో తొలిసారి వినియోగదారుల వ్యయం పెరగడం ఆశాజనకంగా మారింది. జపాన్ ప్రభుత్వం ఆర్థిక ఉద్దీపన చర్యల కారణంగా వినియోగదారులు వ్యయం కొంతమేర పెరిగింది.

మే నెలలో జపాన్ నిరుద్యోగ రేటు 5.2 శాతానికి చేరుకుంది. దేశంలో ఈ స్థాయిలో నిరుద్యోగ రేటు సెప్టెంబరు 2003లో నమోదయింది. ఇదిలా ఉంటే ఈ ఏడాది ఏప్రిల్ నెలలో నిరుద్యోగ రేటు 5.0 శాతం వద్ద ఉందని జపాన్ అంతర్గత వ్యవహారాల శాఖ వెల్లడించింది. ఆర్థిక మాంద్యం కారణంగా ఎగుమతులు, ఉత్పత్తి బాగా పడిపోవడంతో జపాన్ ఆర్థిక వ్యవస్థ ఇబ్బందికర పరిస్థితి ఎదుర్కొంటుంది.

మే నెలలో దేశంలో నిరుద్యోగుల సంఖ్య 770000కి చేరుకుంది. ఏడాది క్రితం ఇదే సమయంలో నిరుద్యోగుల సంఖ్య 3.47 మిలియన్ల వద్ద ఉండగా అది ఇప్పుడు 28.5 శాతం మేర పెరిగిందని జపాన్ అధికారిక వర్గాలు వెల్లడించాయి. అనేక జపాన్ కంపెనీలు, ముఖ్యంగా ఎగుమతుల ఆధారిత కంపెనీలు ఉద్యోగాల్లో భారీగా కోతపెట్టాయి.

అంతర్జాతీయ ఆర్థిక సంక్షోభం కారణంగా డిమాండ్ బాగా పడిపోవడంతో పరిశ్రమల ఉత్పాదకత కూడా బాగా దెబ్బతింది. మేలో ఉద్యోగులకు వెళుతున్న ప్రతి వంద మందికి 44 ఉద్యోగాలు మాత్రమే అందుబాటులో ఉన్నాయి. ఏప్రిల్‌లో అయితే 46 ఉద్యోగులు అందుబాటులో ఉన్నాయని జపాన్ కార్మిక శాఖ మంగళవారం తెలిపింది.