ఇరాన్ అధ్యక్ష ఎన్నికల్లో అక్రమాలు జరగలేదు

ఇరాన్‌లో శక్తివంతమైన గార్డియన్ కౌన్సిల్ ఇటీవల దేశంలో జరిగిన అధ్యక్ష ఎన్నికల్లో ఎటువంటి అక్రమాలు జరగలేదని స్పష్టం చేసింది. దేశంలో ఎన్నికలను పర్యవేక్షించే గార్డియన్ కౌన్సిల్ ప్రతినిధి అబ్బాసాలీ కడ్కోడాయ్ శుక్రవారం మాట్లాడుతూ.. జూన్ 12నాటి అధ్యక్ష ఎన్నికల్లో అక్రమాలేమీ జరగలేదన్నారు.

ఈ ఎన్నికల్లో అహ్మదీనెజాద్ తిరిగి విజయం సాధించిన సంగతి తెలిసిందే. మరో నాలుగేళ్లపాటు ఆయన అధ్యక్ష బాధ్యతల్లో కొనసాగేందుకు తాజా ఎన్నికల్లో స్పష్టమైన తీర్పు వచ్చింది. ఈ ఎన్నికల్లో అక్రమాలు జరిగాయని, అహ్మదీనెజాద్ రిగ్గింగ్ చేసి గెలిచారని ఆయన ప్రత్యర్థులు ఆరోపణలు చేస్తున్నారు.

అంతేకాకుండా వారు చేస్తున్న ఆందోళన కార్యక్రమాలతో గత రెండు వారాలుగా ఇరాన్‌లో ఉద్రిక్త పరిస్థితులు నెలకొని ఉన్నాయి. ఈ నేపథ్యంలో గార్డియన్ కౌన్సిల్ ప్రతినిధి మాట్లాడుతూ.. ఈ ఎన్నికల్లో అక్రమాలేమీ జరగలేదన్నారు. గత పది రోజులుగా ఎన్నికల ప్రక్రియను అబ్బాసాలీ పరిశీలించారు. తమ పరిశీలనలో అవకతవకలేవీ కనిపించలేదన్నారు.