గతంలో వచ్చిన అవతార్ చిత్రం ప్రపంచ వ్యాప్తంగా మంచి విజయాన్ని సొంతం చేసుకుంది. 237 మిలియన్ డాలర్ల బడ్జెట్‌తో తెరకెక్కిన ఈ సైన్స్ ఫిక్షన్ మూవీ ఏకంగా 2.8 బిలియన్ డాలర్లను వసూలు చేసి సరికొత్త రికార్డులను నెలకొల్పింది.
తాజాగా ఈ చిత్రాన్ని మరోమారు శుక్రవారం విడుదల చేశారు. అయినప్పటికీ భారీ కలెక్షన్లు సాధించడం అవతార్ సత్తాకు నిదర్శనం. ఒక్క భారత్‌లోనే అడ్వాన్స్ బుకింగ్‌ల రూపంలోనే ఈ చిత్రానికి కోటి రూపాయలను వసూలు చేసింది. ఈ వారాంతం నాటికి దేశంలో రూ.5 కోట్లు వసూలు చేసే అవకాశలున్నాయని సినీ వాణిజ్య వర్గాలు పేర్కొంటున్నాయి.
అలాగే, ఫ్రాన్స్, కొరియా, సౌదీ అరేబియా, బెల్జియం, ఫిలిప్పీన్స్ దేశాల్లోనూ అవతార్ కలెక్షన్ల పరంగా దూసుకుపోతోంది. "అవతార్" చిత్రాన్ని ప్రఖ్యాత దర్శకుడు జేమ్స్ కామెరాన్ తెరకెక్కించారు. ఇందులో శామ్ వర్దింగ్టన్, జో సల్దానా, సిగోర్నీ వీవర్, స్టీఫెన్ లాంగ్ తదితరులు నటించారు. అవతార్ తదుపరి భాగాలు కూడా ప్రేక్షకుల ముందుకు రానున్నాయి. "అవతార్-2" చిత్రం ఈ యేడాది ఆఖరులో విడుదలకానుంది.