తన బాయ్‌ఫ్రెండ్ బ్రెయిన్ ఆస్టిన్ గ్రీన్‌తో కలిసి హాలీవుడ్ అందాల తార మేగన్‌ఫాక్స్ కొత్తింట్లోకి అడుగుపెట్టనుంది. కొద్దికాలం పాటు నూతన గృహంకోసం వెతుకులాట ప్రారంభించిన మేగన్‌ఫాక్స్‌కు లాస్ఏంజెలెస్ శివార్లలో అద్భుతమైన ఇల్లు దొరికింది. ఈ ఇంటికి తన బాయ్‌ఫ్రెండ్ ఆస్టిన్‌తో కలిసి గృహప్రవేశం చేయనున్నట్లు రియల్ ఎస్టాక్లేర్ డాట్‌కామ్ తెలిపింది.
కొంతకాలం కలిసి.. మరికొంత కాలం విడిపోతూ.. ఉండే ఈ ప్రేమ జంట ఇప్పుడు ఒక్కటై లాస్ఏంజెలెస్ శివార్లలో కొన్న కొత్త ఇంట్లోకి ప్రవేశించనున్నారని హాలీవుడ్ వర్గాలు తెలిపాయి. ఈ ఇంటిని 29 లక్షల డాలర్లతో మేగన్‌ఫాక్స్ కొనుగోలు చేసింది. ఇంకా ఈ గృహంలో నాలుగు బెడ్‌రూమ్‌లు, స్పా వసతులతో ఓ మాస్టర్‌బాత్‌రూమ్ కూడా ఉంటుందని ఎస్టాక్లేర్ డాట్‌కామ్ వెల్లడించింది.
ఇదిలా ఉంటే... ట్రాన్స్‌ఫార్మర్ చిత్రంలో అందాలను ఆరబోసిన హాట్ బ్యూటీ మేగన్‌ఫాక్స్.. ఆస్టిన్ గ్రీన్‌తో ప్రేమాయణం కొనసాగిస్తోన్న సంగతి తెలిసిందే. వీరిద్దరు తమ ప్రేమను బలపరిచేవిధంగా ఒకే ఇంట్లో జీవనం గడుపనున్నారు. త్వరలో వీరిద్దరికీ వివాహం కాబోతుందని మేగన్‌ఫాక్స్ సన్నిహితులు అంటున్నారు.