గుండెపోటుకు దారితీసే గురక.. నాసికా రంధ్రాలు మూసుకుపోవడం వల్లే...

అతిగా తిని ఎక్కువగా గురకపెడుతూ సోమరితనంతో కాలం వెళ్లదీయకండని పెద్దవాళ్లు హెచ్చరించడం మనం వింటూనే ఉంటాం. గురక సోమరితనం వల్లే కాకుండా కొన్ని వ్యాధులలో కూడా కనిపిస్తుంది. స్థూలకాయుల్లో, ఫారింజైటిన్ వంటి వ్యాధులతో బాధపడేవారిలో గురక కనిపిస్తుంది. ఏ వ్యాధి లేనివారు కూడా గాఢనిద్రలో ఉన్నప్పుడు ఒక్కొక్కసారి గురకపెడతారు. అతి సామాన్యంగా కనిపించే ఈ గురక మనిషి లావు పెరగడానికే కాకుండా, గుండెపోటు, ఇతర గుండె జబ్బులకు దారి తీస్తుందని పరిశోధకులు హెచ్చరిస్తున్నారు.

సాధారణంగా గురకపెట్టేవారు వెల్లికిలా పడుకుని సగం నోరు తెరుచుకుని ఉంటారు. శ్వాస కూడా సగం ముక్కు ద్వారా, సగం నోటి ద్వారా పీల్చుతుంటారు. గురక పెట్టడానికి లింగభేదం, వయోభేదం లేకపోయినప్పటికీ ఎక్కువగా మగవారిలోనూ వృద్ధుల్లోనూ ఎక్కువగా కనిపిస్తోంది. 

వాతావరణ మార్పులు తరచుగా వచ్చే దగ్గు, జలుబు సైనుసైటిస్ మొదలైన వాటి వలన కూడా నాసికా రంధ్రాల్లో అవరోధం ఏర్పడి గురక వచ్చే అవకాశాలు ఉన్నాయి. అదేసమయంలో గురక వల్ల గుండెకు ఎలాంటి హాని కలుగకుండా ఉండేందుకు జాగ్రత్తలు తీసుకోవాలి.

ఏ కారణం చేతనైనా నాసికా రంధ్రాలు మూసుకుపోయినప్పుడు పెద్దగా శ్వాస తీసుకుంటారు. అపుడు గొంతులో ఉండే ఫారింక్స్ లేదా సాఫ్ట్ పాలెంట్ కణజాలం కదలికల వలన పలు రకాల స్థాయిలలో గురక వస్తుంది. సిగరెట్లు, మద్యం మొదలైన అలవాట్లు ఉన్న వారికి కూడా గురక వస్తుంది. 

అయితే, గురక ఉన్న వారు మాత్రం కొన్ని జాగ్రత్తలు పాటించడం ద్వారా దీని నుంచి విముక్తి పొందవచ్చు. గొంతునొప్పి లేదా దురద ఉంటే వెంటనే వైద్యులను సంప్రదించాలి. అదే సమయంలో సిగరెట్లు, మద్యం సేవించడం మానేయాలని వైద్యులు సలహా ఇస్తున్నారు.