పచ్చి కొబ్బరిని చాలా మంది ఇష్టంగా తింటారు. దీనిని మసాలాలలో, కూరల్లో కూడా ఉపయోగిస్తారు. కొబ్బరితో పచ్చడి చేసుకుంటే రుచి అద్భుతంగా ఉంటుంది. ఇలా అనేక రకాలుగా ఉపయోగపడే కొబ్బరి మన శరీరానికి కూడా ఎంతో మేలు చేస్తుంది. కొబ్బరి తింటే చాలా రోగాల నుండి బయటపడవచ్చు. చెడు కొలెస్ట్రాల్‌ని ఇది తొలగిస్తుంది, కిడ్నీ సమస్యల నుండి కాపాడుతుంది.
దీనిని తరచుగా తీసుకుంటే థైరాయిడ్ సమస్యలు దరిచేరవని ఆరోగ్య నిపుణులు సూచిస్తున్నారు. పొట్ట చుట్టూ పేరుకుపోయిన క్రొవ్వును కూడా ఇది కరిగిస్తుంది. కొబ్బరిలో ఫైబర్ అధికంగా ఉండటం వల్ల మధుమేహ వ్యాధిని అదుపులో ఉంచుతుంది. శరీరంలోని వ్యర్థ పదార్థాలను బయటకు పంపివేస్తుంది. పాల కన్నా కొబ్బరి నీళ్లల్లో పోషక విలువలు పుష్కలంగా ఉన్నాయి.
ఎసిడిటీ, గుండె మంటను కొబ్బరి నీరు తగ్గిస్తుంది. కొబ్బరి తీసుకోవడం వలన రక్తంలో ఆక్సిజన్ పాళ్లు పెరిగి రక్తప్రసరణ సాఫీగా జరుగుతుంది. జిడ్డు చర్మానికి కొబ్బరి నీళ్లు చక్కగా పనిచేస్తాయి. చర్మంలోని అదనపు ఆయిల్స్‌ను తొలగించి చర్మాన్ని ఆరోగ్యంగా ఉంచుతుంది. కొబ్బరిలోని యాంటీ బ్యాక్టీరియల్, యాంటీ ఫంగల్ గుణాలు తలలో చుండ్రు, పేలు చేరడం వంటి సమస్యల నుండి ఉపశమనం కలిగిస్తుంది.