మే మొదటి ఆదివారం ప్రపంచ నవ్వుల దినోత్సవంగా జరుపుకుంటారు. ఈ సంవత్సరం, మే 2 న జరుపుకుంటారు. 1998 నుండి జరుపుకుంటున్నాం. ప్రపంచ నవ్వుల దినోత్సవం అనేది నవ్వు, దాని అనేక ఆరోగ్య ప్రయోజనాల గురించి అవగాహన పెంచడానికి జరుపుకునే వార్షిక కార్యక్రమం. రోజుకు కనీసం 30 నిమిషాలైనా మనసారా నవ్వకపోతే అనారోగ్యం తప్పదంటున్నారు ఆరోగ్య నిపుణులు.
ఎందుకంటే నవ్వులో పాజిటివ్ భావాలతో పాటు హీలింగ్ ప్రక్రియ కూడా ఉంది. డాక్టర్ మదన్ కటారియా లాఫింగ్ క్లబ్ స్థాపకునిగా మనదేశంలో 1300 క్లబ్బులు, విదేశాల్లో 700 పైగా నెలకొల్పి 'అంతా నవ్వండి, నవ్వించండి' అని ప్రచారం చేస్తున్నారు. నవ్వుకు ఉన్న ప్రాధాన్యాన్ని గుర్తించిన కటారియా విస్తృతంగా ప్రచార కార్యక్రమాలు నిర్వహిస్తున్నారు.
హాస్యం మన సమస్యల్ని దూరం చేస్తుంది. హాయిగా గాఢమైన నిద్ర పడుతుంది. అమెరికాలోని 'సండే రివ్యూ' పత్రికా సంపాదకుడు నార్మెన్ క్యూసిన్స్ బాగా జబ్బుపడితే... అతను ఇక కొన్నిరోజులే బ్రతుకుతాడని డాక్టర్లు చెప్పేశారు. చివరి ప్రయత్నంగా అతనికి లాఫింగ్ థెరపీ చేశారు. అతను ఓ పది నిమిషాలపాటు కడుపుబ్బ నవ్వేవిధంగా అనేక కామిక్స్ చూపించారు. ఈ ప్రక్రియను కొన్నాళ్లు అలానే సాగించారు. అంతే ఆయన జీవితకాలం పెరిగింది.
కనుక నవ్వటం అనేది ఓ ఆరోగ్య సూత్రం. అందుకని ఈ ప్రపంచ హాస్య దినోత్సవం రోజునుంచి మనమందరం తనివితీరా నవ్వుకుందాం. హ.. హ్హ... హ్హ్హ.... గట్టిగా నవ్వండి... కడుపుబ్బ నవ్వండి. నవ్వించండి.