పెళ్లి వేడుకలో యువకుడి కొంటె పని... ఆగిన పెళ్లి

ఒక పెళ్లి వేడుకలో యువకుడు చేసిన కొంటెపనికి కొన్ని క్షణాల్లో జరగాల్సిన పెళ్లి ఆగిపోయింది. ఈ ఘటన ఉత్తరప్రదేశ్ రాష్ట్రంలోని ఘాజీపూర్ పట్టణంలో చోటుచేసుకుంది. తాజాగా వెలుగులోకి వచ్చిన ఈ వివరాలను పరిశీలిస్తే, 

ఘాజీపూర్‌లో ఓ యువతికి పెళ్ళి చేసుకునేందుకు అన్ని ఏర్పాట్లు చేశారు. ఈ పెళ్లికి అందరి మాదిరే ఓ యువకుడు కూడా వచ్చాడు. వధువు తరపు వారు అతడిని గమనించలేదు. వధువు వరుడి మెడలో దండ వేయబోతోంది. 

ఆ సమయంలో సదరు యువకుడు మండపంపైకి వెళ్లి ఒక్కసారిగా వధువు నుదుటిపై సింధూరం దిద్దాడు. ఇది చూసి పెళ్లి కొడుకు అవాక్కయ్యాడు. చుట్టూ ఉన్న వారు సింధూరం దిద్దిన వ్యక్తిని పట్టుకుని చితకబాదారు. అక్కడకు చేరుకున్న పోలీసులు నిందితుడిని అదుపులోకి తీసుకున్నారు. ఇదంతా చూసిన వరుడి కుటుంబ సభ్యులు పెళ్లిని రద్దు చేసుకుని వెళ్లిపోయారు.

ఈ పని చేసిన వ్యక్తిని రామాశిష్‌గా గుర్తించారు. వధువు గ్రామానికి చెందిన రామాశిష్ ఆమెను ప్రేమిస్తున్నాడు. పెళ్లి ఆగిపోవడం కోసమే ఈ పని చేసినట్లు తెలుస్తోంది. దీనిపై వధువు కుటుంబ సభ్యులు పోలీసులకు ఫిర్యాదు చేశారు. సదరు వ్యక్తి తమ కుమార్తెను ఏడేళ్లుగా అత్యాచారం చేస్తున్నాడని, అతడి దగ్గర వీడియోలు కూడా ఉన్నాయని ఫిర్యాదులో పేర్కొన్నారు.