ప్రపంచ కప్ 2019 పోటీల్లో భాగంగా నిన్న బుధవారం నాడు జరిగిన మ్యాచులో దక్షిణాఫ్రికా హ్యాట్రిక్ ఓటమిని మూటగట్టుకుంది. అంతకుముందు బంగ్లాదేశ్, ఇంగ్లాండు చేతిలో ఓడిన దక్షిణాఫ్రికా భారత్ చేతిలోని పరాజయం పాలైంది. భారత స్పిన్నర్ చాహల్ 4 వికెట్లు తీసి ఆ జట్టు వెన్నువిరిచాడు. మరోవైపు బుమ్రా కీలకమైన 2 వికెట్లు తీసి నడ్డి విరిచాడు. దీనితో 50 ఓవర్లలో కేవలం 227 పరుగులే చేయగలగింది.
ఆ తర్వాత క్రీజులో దిగిన భారత జట్టు బ్యాటింగ్ తొలుత నత్త నడకన సాగింది. శిఖర్ ధావన్, విరాట్ కోహ్లి ఇద్దరూ ఆడుదామా వద్దా అన్నట్లుగా ఆడి వికెట్లను పారేసుకుని వెళ్లిపోయారు. రోహిత్ శర్మ మాత్రం వికెట్ల వద్ద పాతుకునిపోయాడు. ఏకంగా 144 బంతుల్లో 122 పరుగులు చేసి నాటవుట్ గా నిలిచాడు. జట్టు విజయానికి పునాదిరాయిలా నిలబడ్డాడు. అందుకే ఇపుడంతా రోహిత్ శర్మను సోషల్ మీడియాలో ఇలా పొగడ్తలతో ముంచెత్తుతున్నారు. మరోవైపు దక్షిణాఫ్రికా జట్టును తూర్పారబడుతున్నారు.