షోయబ్ తప్పుడు "తలాక్": మొదటికొచ్చిన పెళ్లి కథ

PTI

షోయబ్ మైండ్ సెట్ ఏమిటో... ఎవరికీ ఓ పట్టాన అర్థం కావడం లేదు. సానియా మీర్జాతో పెళ్లికి లైన్ క్లియర్ అవ్వాలనే ఉద్దేశ్యంతో పెద్ద మనుషుల మధ్యవర్తిత్వం ద్వారా అయేషా సిద్ధీఖీకి లిఖితపూర్వకంగా షోయబ్ తలాక్ చెప్పాడు. అయితే ఈ తలాక్ విషయంలో షోయబ్ మరోసారి తన మోసపూరితమైన బుద్ధిని చూపించాడు.

తలాక్ పత్రంలో తండ్రి పేరును మాలిక్ ఫకీర్ హుస్సేన్‌కు బదులుగా మాలిక్ సలీం హుస్సేన్‌గా మార్చి రాశాడు. నిజం నిప్పులాంటిది కనుక వెంటనే తేలిపోయింది. తన పెళ్లి ఆహ్వాన పత్రికలో తన తండ్రి పేరును సరియైనదిగా సూచించి విడాకుల పత్రంలో ఇలా మార్చి ఎందుకు రాశాడనేది చర్చనీయాంశంగా మారింది. ఈ విషయాన్ని తేల్చుకునేందుకు అయేషా కుటుంబం మరోసారి రంగంలోకి దిగింది. మొత్తమ్మీద షోయబ్ తప్పుడు సమాచారం కారణంగా విడాకులు చెల్లవని ఖాజీ పెద్దలు చెప్పినట్లు సమాచారం.

ఈ పరిణామంతో టెన్నిస్ స్టార్ సానియా మీర్జా పెళ్లి కథ మళ్లీ మొదటికొచ్చినట్లయింది. మరోవైపు రోజుకో సమస్యతో ఉక్కిరిబిక్కిరి చేస్తున్న షోయబ్ గొడవ ఎలా వదిలించుకోవాలో అర్థంకాక సానియా కుటుంబం తల పట్టుకున్నట్లు సమాచారం. ఇంకోవైపు నిఖా చేయాల్సిన రోజు ఏప్రిల్ 15 సమీపిస్తోంది. అయితే సమస్యల మీద సమస్యలు చుట్టుముడుతున్న తరుణంలో సానియా వివాహం ఏప్రిల్ 15న జరుగుతుందా..? వాయిదా పడుతుందా... అనే సందేహాలు తలెత్తుతున్నాయి.