ఇటీవలి కాలంలో బ్యాట్స్‌మెన్‌గా, అమోఘమైన రీతిలో రాణిస్తోన్న ఆస్ట్రేలియా లెఫ్ట్ ఆర్మ్ సీమ్ బౌలర్ మిచెల్ జాన్సన్... సమీప భవిష్యత్‌లో, టీం ఇండియా మాజీ కెప్టెన్ కపిల్‌దేవ్‌లాగా తయారవుతాడని... ఆసీస్ మాజీ కెప్టెన్ స్టీవ్ వా జోస్యం చెబుతున్నాడు.
ఈ మేరకు స్టీవ్ వా మీడియా ప్రతినిధులతో మాట్లాడుతూ... గ్రేట్ ఆల్‌రౌండర్లైన కపిల్ దేవ్, ఇయాన్ బోథమ్‌ల తరహాలో.. ఆరో నెంబర్‌గా బ్యాటింగ్‌కు దిగి బ్యాట్ ఝుళిపించే సత్తా జాన్సన్‌లో ఉందని కొనియాడాడు.
ఒక రకంగా చెప్పాలంటే... ఇన్నాళ్లుగా అసలు సిసలైన ఆల్‌రౌండర్ కోసం వెతుకులాడుతున్న ఆసీస్ జట్టుకు ఇకపై ఆ కొరత తీరినట్లైందని స్టీవ్ వా అంటున్నాడు. ప్రస్తుతం ఆతిథ్య దక్షిణాఫ్రికా జట్టుతో జరుగుతున్న టెస్ట్ మ్యాచ్ తొలి ఇన్నింగ్స్‌లో జాన్సన్ 96 పరుగులతో అజేయంగా నిలిచిన నేపథ్యంలో స్టీవ్ పై విధంగా స్పందించాడు.