భారత క్రికెట్ కోచ్‌గా డేనియల్ వెటోరీ: బీసీసీఐకి కోహ్లీ ప్రతిపాదన!

కివీస్ మాజీ క్రికెటర్ డేనియల్ వెటోరీ భారత జాతీయ క్రికెట్ జట్టుకు కోచ్‌గా ఎంపికయ్యే అవకాశాలున్నట్లు వార్తలొస్తున్నాయి. ఐపీఎల్‌లో బెంగళూరు జట్టుకు 2014 సీజన్ నుంచి కోచ్‌గా వ్యవహరిస్తున్న వెటోరీ పేరును ఆ జట్టు కెప్టెన్ విరాట్ కోహ్లీ బీసీసీఐ ప్రతిపాదించినట్లు తెలుస్తోంది. భారత టెస్టు జట్టు కెప్టెన్‌గా విరాట్ కోహ్లీ తన అభిప్రాయాన్ని బీసీసీఐకి తెలియజేశాడు. 

అయితే బీసీసీఐ వెటోరీని కోచ్‌గా నియమించే విషయంలో ఎలాంటి నిర్ణయం తీసుకోలేదు. వన్డే ప్రపంచకప్‌-2015 తర్వాత రిటైరైన వెటోరీ ప్రస్తుతం ఐపీఎల్‌లో రాయల్‌ ఛాలెంజర్స్‌ బెంగళూరు, బిగ్‌బాష్‌ లీగ్‌లో బ్రిస్బేన్‌ హీట్‌ హెడ్‌కోచ్‌గా వ్యవహరిస్తున్నాడు. 

గతంలో ఆర్‌సీబీ తరఫున ఆడిన వెటోరీ, ప్రస్తుత కెప్టెన్‌ కోహ్లీ మధ్య మంచి అనుబంధం కూడా ఉంది. ఈ నేపథ్యంలో కోచ్‌గా వెటోరీ ట్రైనింగ్ మెరుగ్గా ఉండటంతోనే కోహ్లీ అతని పేరును బీసీసీఐకి ప్రతిపాదించినట్లు వార్తలొస్తున్నాయి.