ఆస్ట్రేలియా బౌలర్ షేన్ వార్న్ చేసిన తీవ్ర విమర్శలపై మాజీ కెప్టెన్ స్టీవ్ వా వివరణ ఇచ్చారు. కొన్నిసార్లు కఠిన నిర్ణయాలు తప్పవని స్టీవ్ వా అభిప్రాయపడ్డాడు. కేవలం ఒక్క మాటతో షేన్ వార్న్ చేసిన వ్యాఖ్యలను ఖండించలేదని స్టీవ్ వా చెప్పుకొచ్చాడు. తనను 1999లో వెస్టిండీస్‌తో జరిగిన టెస్టు మ్యాచ్ నుంచి స్టీవ్ వా అన్యాయంగా తొలగించాడంటూ ఆయనో సెల్ఫిష్ క్రికెటర్ అని షేన్ వార్న్ స్టీవ్ వాపై విమర్శలు గుప్పించాడు.
దీనిపై స్టీవ్ వా స్పందిస్తూ.. అప్పట్లో జట్టు ప్రయోజనాలే ముఖ్యమని భావించిన మీదటే, కెప్టెన్‌గా తన పని తాను చేసుకుపోయానని, వార్న్‌పై వ్యక్తిగత కోపమేమీ లేదని తెలిపాడు. జట్టులోని ఏ ఆటగాడిని తొలగించాలన్నా అది చాలా క్లిష్టమైన అంశమేనని స్టీవ్ వా వ్యాఖ్యానించాడు. ఏ నిర్ణయం తీసుకున్నా అంతిమంగా, దేశ ప్రయోజనాలు, జట్టు గెలుపే ముఖ్యమని వెల్లడించాడు. ఈ క్రమంలో ఆ రోజు తాను తీసుకున్న నిర్ణయం సరైందేనని స్టీవ్ వా అన్నాడు.