అంతర్జాతీయ క్రికెట్ మండలి (ఐసీసీ) అధ్యక్ష పదవికి ముస్తఫా కమల్ రాజీనామా బుధవారం చేశారు. బంగ్లాదేశ్‌కు చెందిన ముస్తఫా ఐసీసీ నిర్ణయాలపై బహిరంగంగానే తన అసంతృప్తి వెళ్లగక్కిన సంగతి తెలిసిందే. ముఖ్యంగా ప్రపంచ కప్ మెగా టోర్నీలో భాగంగా భారత్ - బంగ్లాదేశ్‌ల మధ్య జరిగిన క్వార్టర్ ఫైనల్ మ్యాచ్‌లో అంపైర్లు తీసుకున్న తప్పుడు నిర్ణయాల కారణంగానే తన దేశ జట్టు ఓటమిపాలైందని కమల్ వ్యాఖ్యానించి సంచలనం సృష్టించారు.
ఆ సమయంలో తన పదవికి రాజీనామా చేయనున్నట్టు ప్రకటించారు. దీనిపై తీవ్రమైన దుమారం చెలరేగడంతో ఆయన మాట మార్చారు. ఆ తర్వాత విశ్వవిజేతగా అవతరించిన క్రికెట్ జట్టుకు ట్రోఫీని అందజేసే విషయంలో మళ్లీ వివాదం చెలరేగింది. కొత్తగా సృష్టించిన ఐసీసీ ఛైర్మన్ ముందుకొచ్చి ఈ ట్రోఫీని అందజేశారు. దీంతో ఐసీసీ అధ్యక్ష పదవి డమ్మీగా మారింది. ఈ వ్యవహారంతో తీవ్ర మనస్తాపం చెందిన ఆయన... బంగ్లాదేశ్‌కు చేరుకుని తన పదవికి రాజీనామా చేశారు.