వరల్డ్ కప్ టోర్నీలో భాగంగా పూల్ ఏ గ్రూపులో బంగ్లాదేశ్ జట్టు విజయభేరి మోగించింది. బుధవారం జరిగిన మ్యాచ్‌లో ప్రత్యర్థి ఆప్ఘనిస్థాన్ జట్టును 105 పరుగుల తేడాతో చిత్తుచేసింది. కాన్ బెర్రాలో వేదికగా జరిగిన ఈ మ్యాచ్‌లో తొలుత బ్యాటింగ్ చేసిన బంగ్లాదేశ్ జట్టు.. 50 ఓవర్లలో అన్ని వికెట్లు కోల్పోయి 267 పరుగులు చేసిన విషయం తెల్సిందే.
ఆ తర్వాత 268 పరుగుల విజయలక్ష్యంతో బరిలో దిగిన ఆఫ్ఘన్ కూనలు 42.5 ఓవర్లలో 162 పరుగులకు ఆలౌటయ్యారు. ఆ జట్టులో కెప్టెన్ మహ్మద్ నబి (44) టాప్ స్కోరర్‌గా నిలువగా... సమియుల్లా షెన్వారీ 42 పరుగులతో రాణించాడు. మిగతా బ్యాట్స్‌మెన్ విఫలం కావడంతో ఆఫ్ఘన్ జట్టుకు ఓటమి తప్పలేదు. బంగ్లా బౌలర్లలో మొర్తజాకు 3 వికెట్లు దక్కాయి. షకిబ్ అల్ హసన్ 2 వికెట్లు తీశాడు.
అంతకుముందు, టాస్ గెలిచిన బంగ్లాదేశ్ జట్టు బ్యాటింగ్ ఎంచుకుంది. బంగ్లా బ్యాట్స్‌మెన్లలో వికెట్ కీపర్ అయిన రహీం (71) అద్భుతంగా రాణించగా, ఓపెనర్లు హక్యు 29, ఇక్బాన్ 19, సర్కర్ 28, మహ్మదుల్లా 23, షాకిహ్ అల్ హాసన్ 63, మోర్తాజా 14 చొప్పున పరుగులు చేయగా, ఎక్స్‌ట్రాల రూపంలో 13 రన్స్ వచ్చాయి. ఆఫ్ఘన్ బౌలర్లు కట్టుదిట్టంగా బంతులేసి బంగ్లా బ్యాట్స్‌మెన్‌ను కట్టడి చేశారు. దీంతో, బంగ్లాదేశ్ జట్టు 50 ఓవర్లలో 267 పరుగులకు ఆలౌటైంది.