ప్రపంచంలోనే అత్యంత పెద్ద కార్గో విమనాశ్రయాన్ని దుబాయ్‌లో జూన్ 27న ప్రారంభించనున్నట్లు దుబాయ్ విమానాశ్రయ ప్రధాన కార్యనిర్వహణాధికారి పాల్ గ్రిఫ్ఫిత్స్ బుధవారం దుబాయ్‌లో మీడియాకు తెలిపారు.
దుబాయ్‌లోని అల్-మక్దూమ్ అంతర్జాతీయ విమానాశ్రయాన్ని ప్రపంచంలోనే అత్యంత పెద్ద కార్గో విమానాశ్రయంగా రూపొందించి, నిర్మిస్తున్నామని ఆయన తెలిపారు. ఈ ఏడాది జూన్ 27న కార్గో విమానాశ్రయాన్ని ప్రారంభిస్తామని, అదే వచ్చే ఏడాది ప్రయాణీకులు దిగేందుకు వీలుగా విమానాశ్రయాన్ని మరికొంత పునరుద్ధరించి ప్రారంభించేందుకు ప్రణాళికలు రూపొందించుకున్నామని ఆయన వెల్లడించారు.
ప్రయాణీకులు వచ్చి, పోయేందుకు వీలుగా టెర్మినల్‌ నిర్మాణాన్ని ఈ ఏడాది చివరి నాటికి పూర్తి చేసుకుంటుందని ఆయన అన్నారు. వచ్చే సంవత్సరం(2011) వేసవి సెలవులు ప్రారంభమయ్యే మార్చి నెల నాటికి పూర్తిగా ప్రయాణీకుల సేవలతోపాటు కార్గో సేవలు అందుబాటులోకి వస్తాయని ఆయన అన్నారు.
విమానాశ్రయంలో మొత్తం ఆరు రన్‌వేలను ఏర్పాటు చేసినట్లు ఆయన తెలిపారు. ఇందులో భాగంగా మొత్తం 120 మిలియన్ ప్రయాణీకులు వచ్చిపోయేందుకు అనువుగా నిర్మించామన్నారు. రన్ వే నిర్మాణపు పనులు 2007 నుంచి ప్రారంభమయ్యాయన్నారు.