హెల్త్ యూనివర్శిటీకి మళ్లీ ఎన్టీఆర్ పేరు పెడతాం : సీఎం రమేష్

విజయవాడలోని హెల్త్ యూనివర్శిటీకి ఉన్న ఎన్టీఆర్ పేరును వైకాపా ప్రభుత్వం తొలగించింది. ఈ మేరకు బుధవారం అసెంబ్లీలో ఓ బిల్లును ఆమోదించింది. ఇది రాజకీయంగా పెను దుమారం రేపుతోంది. ఎన్టీఆర్ పేరును తొలగించి ఆ స్థానంలో వైఎస్ఆర్ పేరు పెట్టడాన్ని ఎన్టీఆర్ అభిమానులతో పాటు తెదేపా, ఇతర రాజకీయ పార్టీల నేతలు తీవ్రంగా వ్యతిరేకిస్తున్నారు. 

ఈ నేపథ్యంలో బీజేపీ రాజ్యసభ సభ్యుడు సీఎం రమేష్ ఈ పేరు మార్పుపై బుధవారం స్పందించారు. వచ్చే 2024 ఎన్నికల్లో రాష్ట్రంలో ప్రభుత్వం మారితే మళ్లీ హెల్త్ యూనివర్శిటీకి ఎన్టీఆర్ పేరు పెడతామని తెలిపారు. తెలుగు ప్రజలు ఆరాధ్య దైవం ఎన్టీఆర్ పేరును తొలగించడం అత్యంత సిగ్గుచేటు, దారుణమని చెప్పారు. ఈ చర్యలు తీవ్రంగా ఖండిస్తున్నట్టు చెప్పారు. 

వైకాపా ప్రభుత్వానికి పోయే కాలం దాపురించిందన్నారు. ఎన్టీఆర్ పేరును తొలగించడాన్ని సీఎం జగన్, మంత్రులు, వైకాపా ఎమ్మెల్యేలు, ఎంపీలు నిస్సగ్గుగా సమర్థించుకోవడం దారుణమన్నారు. దేశ, విదేశాల్లో తెలుగు వారికి ఓ గుర్తింపు తెచ్చిన మహనీయుడు ఎన్టీఆర్ అని కొనియాడారు. అలాంటి మహనీయుడు పట్ల ఈ ప్రభుత్వం వ్యవహరిస్తున్న తీరు  ప్రతి ఒక్క తెలుగువాడిని తీవ్ర ఆవేదనకు లోనుచేస్తుందని తెలిపారు.

గత మూడున్నరేళ్ల వైకాపా పాలనలో ఒక్క రోడ్డు, భవనం, ప్రాజెక్టు కూడా నిర్మించలేదని, చివరకు రోడ్డుపై ఉన్న గుంతలు కూడా పూడ్చలేదని ఈ సర్కారు పాతవాటి పేర్లు మార్చుతూ పబ్బం గడుపుకుంటుందన్నారు.