చిత్తూరు జిల్లాలో అటవీ భూములను ఆక్రమించారనే ఆరోపణలపై మాజీ మంత్రి పెద్దిరెడ్డి రామచంద్రారెడ్డి, ఆయన కుటుంబంపై కఠిన చర్యలు తీసుకోవాలని ఆంధ్రప్రదేశ్ ఉప ముఖ్యమంత్రి, అటవీ, పర్యావరణ శాఖ మంత్రి పవన్ కళ్యాణ్ అధికారులను ఆదేశించారు.
అటవీ సంరక్షణ చట్టాల కింద నిబంధనలను అమలు చేయడంతో పాటు, బాధ్యులపై క్రిమినల్ కేసులు నమోదు చేయాలని ఆయన ఆదేశించారు. పెద్దిరెడ్డి రామచంద్రారెడ్డి, ఆయన కుటుంబం అక్రమంగా అటవీ భూములతో పాటు చిత్తూరు జిల్లాలోని బుగ్గ మఠానికి చెందిన ప్రభుత్వ భూములు, ఆస్తులను ఆక్రమించుకున్నారని ఆరోపణలు వచ్చాయి. ఈ తీవ్రమైన ఆరోపణల నేపథ్యంలో, విజిలెన్స్ అండ్ ఎన్‌ఫోర్స్‌మెంట్ డైరెక్టర్ జనరల్ వివరణాత్మక దర్యాప్తు నిర్వహించి ఉప ముఖ్యమంత్రి పవన్ కళ్యాణ్‌కు సమగ్ర నివేదికను సమర్పించారు.
ఆ నివేదిక ప్రకారం, భూ ఆక్రమణలకు పాల్పడిన వారిపై క్రిమినల్ అభియోగాలు నమోదు చేయాలని సిఫార్సు చేసింది. ఈ అక్రమ ఆక్రమణలను నిరోధించడంలో విఫలమైన ప్రభుత్వ అధికారులను గుర్తించి వారిని జవాబుదారీగా ఉంచాలని కూడా సూచించింది.