No More Ration Rice : మధ్యాహ్నా భోజన పథకంలో ఇకపై సన్నబియ్యం

ప్రభుత్వ పాఠశాలల్లోని 1వ తరగతి నుండి ఇంటర్మీడియట్ వరకు విద్యార్థులు మధ్యాహ్నం నాణ్యమైన ఆహారం అందనుంది. మధ్యాహ్న భోజన పథకంలో ఇకపై రేషన్ బియ్యం వాడరు. రాష్ట్ర ప్రభుత్వం మధ్యాహ్న భోజన పథకంలో రేషన్ బియ్యాన్ని సన్న బియ్యంతో భర్తీ చేయాలని నిర్ణయించింది. దీని కోసం, 95,509 టన్నులకు పైగా సన్న బియ్యం సరఫరా చేయాలనుకుంటుంది. 

వేసవి సెలవుల తర్వాత జూన్ 12న పాఠశాలలు తిరిగి ప్రారంభం కానున్నాయి. ఈ నేపథ్యంలో మధ్యాహ్న భోజన పథకంలో భాగంగా రేషన్ బియ్యం స్థానంలో సన్న బియ్యం వేసేందుకు సర్కారు నిర్ణయించింది. ఇందులో భాగంగా సన్న బియ్యం సంచులు ఇప్పటికే పాఠశాలలకు చేరుకున్నాయి. 

ఈ సన్నబియ్యం దుర్వినియోగాన్ని నివారించడానికి ప్రతి సంచిలో QR కోడ్ ఉంటుంది. విద్యా సంవత్సరం మొదటి రోజు నుండే సన్న బియ్యం వండుతారు. పాఠశాలలు, హాస్టళ్లలోని పిల్లలకు వడ్డిస్తారు. దీని కోసం, ప్రభుత్వ పాఠశాలలు, కస్తూర్బా గాంధీ బాలికా విద్యాలయాలు, నేతాజీ సుభాష్ చంద్రబోస్ ఆవాస విద్యాలయాలు, ఇతర హాస్టళ్ల యాజమాన్యాలు అవసరమైన ఏర్పాట్లు చేశాయి. 

1-5 తరగతి విద్యార్థులకు భోజనానికి 100 గ్రాముల బియ్యం, 6-10 తరగతుల విద్యార్థులకు 150 గ్రాములు, ఇంటర్ విద్యార్థులకు దాదాపు 200 గ్రాములు అవసరమని అంచనా. రాష్ట్రంలో 32,65,635 మందికి పైగా విద్యార్థులు ఈ పథకం ద్వారా ప్రయోజనం పొందుతున్నారు. ఒక సంవత్సరానికి 75,400 మెట్రిక్ టన్నుల బియ్యం అవసరం అవుతుంది.