నెల్లూరు జిల్లాలో దారుణం జరిగింది. ఆ భార్య భర్తతో సంసారం చేసేందుకు నిరాకరించింది. దీంతో ఆగ్రహించిన భర్త.. ఆమె తల్లిని అంటే అత్తను నరికి చంపేశాడు. ఈ దారుణ ఘటన జిల్లాలోని దూబగుంట గ్రామంలో జరిగింది.
తాజాగా వెలుగులోకి వచ్చిన ఈ వివరాలను పరిశీలిస్తే, దూబగుంట గ్రామానికి చెందిన తిరుపాల్ అనే వ్యక్తి కొన్నేళ్ళ క్రితం చౌట భీమవరానికి చెందిన ఓ యువతిని వివాహం చేసుకున్నాడు. అయితే, తిరుపాల్ పచ్చి తాగుబోతు.
ప్రతిరోజూ మద్యం సేవించి వచ్చి భార్యను చిత్ర హింసలకు గురిచేసేవాడు. పలు మార్లు చితకబాదాడు. భర్త వేధింపులు భరించలేని భార్య... యేడాది క్రితం పుట్టింటికి వెళ్లిపోయింది. ఆ తర్వాత కాపురానికి రావాలంటూ పలుమార్లు ప్రాధేయపడ్డాడు.
అయినప్పటికీ భార్య ససేమిరా అన్నది. దీంతో ఆగ్రహించిన తిరుపాల్.. బుధవారం ఉదయం పీకల వరకు మద్యం సేవించి.. అత్తగారింటికి వెళ్లాడు. మళ్లీ కాపురానికి రావాలంటూ భార్యతో గొడవడుతున్నారు.
ఆ సమయంలో అత్త పోలమ్మ అడ్డు వచ్చింది. దీంతో తిరుపాల్ నిగ్రహం కోల్పోయి అత్తపై విచక్షణారహితంగా దాడి చేసి, నరికి చంపాడు. అనంతరం అక్కడి నుంచి పారిపోయాడు.
ఈ దాడిలో తీవ్రంగా గాయపడిన పోలమ్మ అక్కడికక్కడే ప్రాణాలు విడిచింది. కేసు నమోదు చేసిన పోలీసులు దర్యాప్తు చేస్తున్నారు. పరారీలో ఉన్న నిందితుడి కోసం పోలీసులు గాలిస్తున్నారు.