కేటీఆర్‌ను తెలంగాణ సీఎం కుర్చీలో కూర్చోబెడతారా? ఆయన ఏమన్నారంటే?

దేశ రాజకీయాల్లో తెలంగాణ సీఎం కేసీఆర్ కీలక పాత్ర పోషించనున్నట్లు స్వయంగా ప్రకటించడంతో.. తదుపరి తెలంగాణ సీఎం మీరేనా అనే ప్రశ్నకు.. టీఆర్ఎస్ కార్యనిర్వాహక అధ్యక్షుడు కేటీఆర్ స్పందించారు. ప్రత్యేక తెలంగాణ ఉద్యమం సమయంలో టీఆర్ఎస్ తరపున రాష్ట్రమంతా పర్యటించానని చెప్పారు. 

రాష్ట్రం సాధించుకున్నాక సిరిసిల్ల నుంచి ప్రజామోదంతో గెలుపొందానని తెలిపారు. దీంతో సీఎం కేసీఆర్ తనకు మంత్రిగా తన కేబినెట్‌లో ఓ అవకాశం ఇచ్చారని కేటీఆర్ చెప్పారు. టీఆర్ఎస్ శ్రేణులను సమాయత్తం చేసి అప్పట్లో జరిగిన జీహెచ్ఎంసీ ఎన్నికలు ఘనవిజయం సాధించామన్నారు. 

ప్రస్తుతం తనకు పార్టీ కార్యనిర్వాహక అధ్యక్ష పదవిని అప్పగించారు. ఇదే తరహాలో భవిష్యత్ ఇచ్చే ఏ బాధ్యతను అయినా స్వీకరించేందుకు సిద్ధంగా వున్నానని చెప్పారు. రాజకీయాల్లో వారసత్వం అనేది కేవలం ఎంట్రీ పాస్ లాంటిదేనని కేటీఆర్ తెలిపారు. 

ఓసారి రంగంలోకి దిగాక మనల్ని మనం నిరూపించుకోవాల్సి వుంటుందని కేటీఆర్ తెలిపారు. ప్రజల మద్దతును సంపాదించుకోవాల్సి ఉంటుందని వ్యాఖ్యానించారు. తాను గత 12 ఏళ్లుగా రాజకీయాల్లో ఉన్నాననీ, నాలుగు ఎన్నికలను ప్రత్యక్షంగా ఎదుర్కొన్నానని చెప్పారు.