'మూవీ ఆర్టిస్ట్స్ అసోసియేషన్' (మా) అధ్యక్ష ఎన్నికల వ్యవహారం ఇప్పుడు హైకోర్టు మెట్లెక్కింది. గత మార్చి నెల 29వ తేదీన జరిగిన మా ఎన్నికల్లో భారీ ఎత్తున అవకతవకలు చోటు చేసుకున్నట్టు ఆయన ఆరోపిస్తూ కింది కోర్టులో దాఖలు చేసిన పిటీషన్‌ను నాంపల్లి కోర్టు బుధవారం తోసిపుచ్చింది. దీన్ని సవాల్ చేస్తూ ఆయన కోర్టుకెళ్లారు.
ఇటీవల జరిగిన ఎన్నికల ఫలితాలు వెల్లడించుకోవచ్చంటూ హైదరాబాదు సిటీ సివిల్ కోర్టు ఇచ్చిన తీర్పును నటుడు ఓ.కల్యాణ్ హైకోర్టులో సవాల్ చేశారు. ఈ ఎన్నికల్లో ఎన్నో అక్రమాలు జరిగాయని, తిరిగి ఎన్నికలు నిర్వహించేలా ఆదేశాలు ఇవ్వాలంటూ ఆయన పిటిషన్ దాఖలు చేశారు. మరి ఈ వ్యవహారంపై రాష్ట్ర ఉన్నత న్యాయస్థానం ఎలా స్పందిస్తుందో చూడాల్సి ఉంది. ఇదిలావుంటే సివిల్ కోర్టు తీర్పు ప్రకారం రేపు లేదా ఎల్లుండు 'మా' అధ్యక్ష ఫలితాలు వెల్లడికానున్నాయి.