ఆస్తి పన్ను వసూళ్ల కోసం గ్రేటర్ హైదరాబాదు మునిసిపల్ కార్పొరేషన్ ఎంచుకున్న మార్గంపై హైకోర్టు సీరియస్ అయ్యింది. పన్ను వసూళ్ల కోసం ఇళ్లు, కార్యాలయాల ముందు చెత్త డబ్బాలు పెట్టడం ద్వారా పన్ను బకాయిదారులను జీహెచ్ఎంసీ దారిలోకి తెచ్చుకోవాలని యత్నించింది. ఈ యత్నం మొదట్లో మంచి ఫలితాలనే ఇచ్చినా, ఆ తర్వాత బెడిసికొట్టింది. చెత్త డబ్బాలు చూసి బకాయిలు వసూలవుతాయనుకున్న జీహెచ్ఎంసీ అధికారులపై బకాయిదారులు కోర్టుకెక్కారు.
ఈ పిటిషన్‌ను కొద్దిసేపటి క్రితం విచారించిన హైకోర్టు, జీహెచ్ఎంసీ అధికారులపై ఆగ్రహం వ్యక్తం చేసింది. గంటలోగా బకాయిదారుల ఇళ్లముందు పెట్టిన చెత్త డబ్బాలను తీసేయాలని ఆదేశాలు జారీ చేసింది. అంతేకాక పన్ను వసూళ్ల కోసం ప్రత్యామ్నాయ మార్గాలుండగా, ఈ మార్గాన్నే ఎందుకు ఎంచుకున్నారని నిలదీసింది. చెత్త డబ్బాలు తొలగించకపోతే కమిషనర్, అధికారులపై చర్యలకు ఆదేశిస్తామని ఉన్నత న్యాయస్థానం హెచ్చరించింది. హైకోర్టు మొట్టికాయలతో రంగంలోకి దిగిన అధికారులు చెత్త డబ్బాలను తొలగించే పనిని ప్రారంభించారు.