కాంగ్రెస్ పార్టీ కార్యకర్తలు అత్యుత్సాహం ప్రదర్శించారు. ఏపీ పిసిసీ చీఫ్ రఘువీరా రెడ్డి పశ్చిమ గోదావరి జిల్లాలో పలు కార్యక్రమాల్లో పాల్గొనే క్రమంలో కోవూరు వెళ్లారు. తమ నాయకుడు వస్తున్నాడన్న ఉత్సాహంతో కాంగ్రెస్ పార్టీ కార్యకర్తలు మరింత అత్యుత్సాహం చూపించారు. వాళ్లకు ఓ ఐడియా వచ్చింది. రఘువీరా రెడ్డికి మామూలుగా కాకుండా కాస్త విభిన్నంగా స్వాగతం పలుకాలని నిర్ణయించుకున్నారో ఏమోగానీ వెంటనే పావురాలను పట్టుకొచ్చారు.
ఆ పావురాలకు తమ వద్దనున్న తారాజువ్వలను కట్టి వాటికి నిప్పంటించారు. అంతే... తారాజువ్వలతో పాటు పావురాలు గగనంలోకి దూసుకెళ్లిపోయాయి. వాటి ప్రాణాలు కూడా అనంత వాయువుల్లో కలిసిపోయాయి. ఈ ఘటనపై స్థానికులు తీవ్ర ఆగ్రహం వ్యక్తం చేస్తున్నారు. పావురాలను అలా హింసించి చంపారంటూ మండిపడుతున్నారు. వన్యప్రాణుల చట్టం ప్రకారం ఇలాంటి చర్య తీవ్రమైన నేరంగా పరిగణిస్తారు. మరి ఈ దారుణ ఘటన రఘువీరా రెడ్డి దృష్టికి వెళ్లిందో లేదో...?!!