ఇటీవలి వరదల కారణంగా విజయవాడలో అనేక రోజులుగా పలు ప్రాంతాలు నీటిలో మునిగిపోయాయి. బుడమేరు వాగు ఉధృతంగా ప్రవహించడంతో సమీప ప్రాంతాల్లోకి వరద నీరు వచ్చి చేరింది. నగరంలో సాధారణ పరిస్థితులు నెలకొల్పేందుకు ఆంధ్రప్రదేశ్ ప్రభుత్వం 10 రోజుల పాటు అవిశ్రాంతంగా శ్రమించాల్సి వచ్చింది.
ఇంతటి విధ్వంసాన్ని ఎదుర్కొన్న ప్రభుత్వం ఇప్పుడు కొత్త రాజధాని అమరావతిని ఎంతటి వరదలనైనా ఎదుర్కొనే సామర్థ్యంతో నిర్మించాలని యోచిస్తోంది. అమరావతి నిర్మాణంలో భాగంగా మూడు కాల్వలకు రూపకల్పన చేసినట్లు రాష్ట్ర మున్సిపల్ పరిపాలన, పట్టణాభివృద్ధి శాఖ మంత్రి పి.నారాయణ తెలిపారు.
పాలవాగు, కొండవీటి వాగు, గ్రావిటీ కెనాల్ మూడు కాలువలు. ఈ కాలువల నిర్మాణంపై అమరావతి డెవలప్‌మెంట్ కార్పొరేషన్ లిమిటెడ్ (ఏడీసీఎల్) చైర్మన్, ఇతర సంబంధిత అధికారులతో నారాయణ చర్చించారు.
వచ్చే వర్షాకాలం నాటికి ఈ కాలువల పనులు పూర్తి చేయాలని ప్రభుత్వం లక్ష్యంగా పెట్టుకుందని నారాయణ తెలిపారు. ఉండవల్లి, వైకుంఠపురం దగ్గర పంపింగ్ స్టేషన్ల ఏర్పాటుపై చర్చలు జరుగుతున్నాయని పేర్కొన్నారు.
ప్లాన్ ప్రకారం ఉండవల్లి వద్ద ఉన్న పంపింగ్ స్టేషన్‌కు 12,350 క్యూసెక్కులు, వైకుంఠపురంలో 5,650 క్యూసెక్కులు, బకింగ్‌హామ్ కెనాల్ ద్వారా 4 వేల క్యూసెక్కుల నీరు చేరుతుంది.
ఒక్కసారి ఈ కాలువలు నిర్మిస్తే అమరావతికి ఇక ముంపు సమస్యలు ఉండవని, ఎంత పరిమాణంలోనైనా వరద నీటిని నిల్వ చేసుకునే అవకాశం ఉంటుందని నారాయణ పేర్కొన్నారు. మొత్తం ఆరు రిజర్వాయర్లను కూడా నిర్మించాలని ప్రభుత్వం యోచిస్తోంది.
వీటిలో నీరుకొండ దగ్గర 0.4 టీఎంసీలు, కృష్ణాయపాలెం దగ్గర 0.1 టీఎంసీలు, శాకమూరు దగ్గర 0.01 టీఎంసీలు, లాం దగ్గర 0.3 టీఎంసీలు, వైకుంఠపురం దగ్గర 0.3 టీఎంసీల నిల్వ సామర్థ్యాలు ఉన్నాయి.