ఆంధ్రప్రదేశ్ అసెంబ్లీ ఎన్నికలు : ఇండియా టుడే ఎగ్జిట్ పోల్స్ ఫలితాలు ఇవే..

ఇటీవల జరిగిన ఆంధ్రప్రదేశ్ రాష్ట్ర అసెంబ్లీ ఎన్నికల్లో టీడీపీ, జనసేన, బీజేపీ కూటమి కలిసి పోటీ చేసింది. ఈ నెల 4వ తేదీన వెలువడే ఫలితాల్లో ఈ మూడు పార్టీల కూటమి ఏపీలో అధికారాన్ని కైవసం చేసుకుంటుందని ఇండియా టుడ్ ఎగ్జిట్ పోల్స్ సర్వే వెల్లడించింది. ఇదే తరహా ఫలితాలను అనేక సర్వే సంస్థలు వెల్లడించిన విషయం తెల్సిందే. ఈ నేపథ్యంలో ఇండియా టుడే సంస్థ చేపట్టిన సర్వే ఫలితాలను ఆదివారం వెల్లడించింది. 

టీడీపీ సొంతంగా 78-96 స్థానాల్లో విజయం సాధిస్తుందని, మిత్రపక్షాలు జనసేన 16-18 స్థానాల్లో, భారతీయ జనతా పార్టీ 4-6 స్థానాల్లో గెలుపొందుతాయని అంచనా వేసింది. ఇక అధికార వైకాపా 55-77 స్థానాలకే పరిమితమవుతుందని తెలిపింది. ఆంధ్రప్రదేశ్‌ పునర్విభజన తర్వాత పూర్తిగా ఉనికి కోల్పోయిన కాంగ్రెస్‌కు 0-2 స్థానాలు వచ్చే అవకాశం ఉన్నట్లు పేర్కొంది.

ఇండియా టుడే సర్వే ప్రకారం కూటమికి 98-120 స్థానాలు.. వైకాపా 55-77, కాంగ్రెస్‌ 0-2 స్థానాల్లో విజయం సాధించే అవకాశముంది. ఇక పార్టీల వారీగా ఓటు షేర్‌ చూస్తే, టీడీపీకి 42 శాతం, వైకాపా 44 శాతం, జనసేన 7 శాతం, బీజేపీకి 2 శాతం, కాంగ్రెస్‌ 2 శాతం, ఇతరులు 3 శాతం ఓట్లను షేర్‌ చేసుకుంటారని అభిప్రాయపడింది. లోక్‌సభకు సంబంధించి టీడీపీ 13-15, జనసేన 2, బీజేపీ 4-6 స్థానాల్లో విజయం సాధించే అవకాశం ఉండగా, అధికార  వైకాపా 2-4 స్థానాలు గెలిచే అవకాశం ఉన్నట్లు తెలిపింది.