చిన్న సినిమాల నుంచి రాజకీయాల్లోకి... (video)

రవిబాబు సినిమాతో టాలీవుడ్‌కు పరిచయమైన తెలుగమ్మాయి మాధవిలత. ఆ తర్వాత స్నేహితుడా సినిమాలో కనిపించి తన నటనతో ఆకట్టుకుంది. అయితే కొన్నేళ్లుగా సినిమా అవకాశాలు లేక కనుమరుగైన ఈమె టాలీవుడ్ చిత్ర పరిశ్రమను కుదిపేసిన క్యాస్టింగ్ కౌచ్ వ్యవహారంలో కామెంట్స్ చేసి సంచలనంగా మారింది. ఆ తర్వాత రాజకీయాల వైపు దృష్టి మరల్చిన మాధవి ఈసారి అసెంబ్లీ ఎన్నికలలో తన అదృష్టాన్ని పరీక్షించుకోనుంది.

మాధవీలత కొన్ని నెలల క్రితం బీజేపీ పార్టీలో చేరి, అన్ని పార్టీ కార్యక్రమాలలో చురుకుగా పాల్గొంటూ మంచి పేరు సంపాదించుకుంది. ఈ చురుకుదనంతో పాటు సినీ గ్లామర్ ఆమెకు కలిసి వచ్చే అంశాలుగా భావించిన బీజెపీ అధిష్టానం ఈసారి అసెంబ్లీ ఎన్నికలలో ఎమ్మెల్యే అభ్యర్థిగా టికెట్ కేటాయించింది. 

గుంటూరు వెస్ట్ నియోజకవర్గం నుండి ఈమె పోటీ చేయనుంది. ఈ నేపథ్యంలో తనకు ఎమ్మెల్యే టిక్కెట్ ఇచ్చినందుకు మాధవి అధిష్టానానికి, ప్రత్యేకంగా కన్నా లక్ష్మీనారాయణకు కృతజ్ఞతలు చెప్పుకుంది. ఇప్పటికే సినీ పరిశ్రమకు సంబంధించిన కొందరు నటీమణులు ఆంధ్రదేశ రాజకీయాలలో కీలకపాత్ర పోషిస్తున్న నేపథ్యంలో ఈమె మిగతా పార్టీల అభ్యర్థుల నుండి ఉండే పోటీని ఏ మాత్రం తట్టుకుంటుందో చూడాలి మరి.