తెలంగాణ కోసం తెలుగుదేశం పార్టీకి రాజీనామా చేసిన నాగం జనార్ధన్ రెడ్డి కొత్త రాజకీయ పార్టీని ఏర్పాటు చేయనున్నారు. ఈ పార్టీ తెలంగాణ రాష్ట్ర సమితి (తెరాస)కు ధీటుగా ఉంటుందని వార్తలు వినిపిస్తున్నాయి. కేసీఆర్‌కు ధీటుగా రాజకీయ పార్టీని రూపుదిద్దే కార్యచరణ తెరవెనక జరుగుతుందని సమాచారం.
నాగం జనార్దన్ రెడ్డితో పాటు శాసనసభా సభ్యత్వాలకు, తెలుగుదేశం పార్టీకీ రాజీనామా చేసిన శాసనసభ్యులు హరీశ్వర్ రెడ్డి, జోగు రామన్న, వేణుగోపాలాచారి బయటకు కనిపిస్తున్నారు. నిజానికి, తెలంగాణ తాకిడి రంగారెడ్డి జిల్లాకు చెందిన హరీశ్వర్ రెడ్డికి అంతగా లేదు. అయినా, తెలంగాణ కోసమంటూ ఆయన రాజీనామా చేశారు. దీనిని బట్టి తెర వెనక రాజకీయం పురుడు పోసుకుంటోందని తెలిసింది.
మొత్తం మీద, పార్టీ పెట్టే ఆలోచన మాత్రం నాగం బృందానికి ఉందనేది అర్థమవుతోంది. తెలంగాణలోనే ఓ వర్గం కెసిఆర్‌కు దీటుగా రాజకీయ పార్టీని ఏర్పాటు చేసే సన్నాహాల్లో ఉన్నట్లు గత కొద్ది రోజులుగా ప్రచారం సాగుతోంది. ఆ పార్టీకి నాగం జనార్దన్ రెడ్డి కాకుండా మరో నాయకుడు నాయత్వం వహించే అవకాశాలున్నాయని అంటున్నారు.