కాంగ్రెస్‌ పార్టీలో చేరి ఇమేజ్ పోగొట్టుకున్న చిరంజీవి: అంబటి

కాంగ్రెస్ పార్టీలో చేరి ప్రజారాజ్యం పార్టీ అధినేత చిరంజీవి తన ఇమేజ్‌ను పోగొట్టుకున్నారని మాజీ పార్లమెంటు సభ్యుడు జగన్ వర్గం నేత అంబటి రాంబాబు వ్యాఖ్యానించారు. పీఆర్పీ అధ్యక్షుడిగా చిరంజీవికి మంచి ఇమేజ్ ఉందన్నారు. అయితే చిరు కాంగ్రెస్ పార్టీలో చేరి "చిరు" జీవిగా మారిపోయారని అంబటి ఎద్దేవా చేశారు.

మాజీ ఎంపీ వై.ఎస్. జగన్మోహన రెడ్డి చేస్తున్న హరితయాత్రలో పాల్గొన్న అంబటి బుధవారం విలేకరులతో మాట్లాడారు. 2003 వైయస్ పాదయాత్రలో పాల్గొన్నానని, ఇప్పుడు జగన్ పాదయాత్రలో కూడా పాల్గొనడం ఎంతో సంతోషంగా ఉందన్నారు.

పనిలో పనిగా పీఆర్పీ కాంగ్రెస్ పార్టీలో విలీనం కావడంపై విమర్శల వర్షం కురిపించిన అంబటి, వచ్చే నెలలో జగన్మోహన రెడ్డి కొత్త పార్టీ వస్తుందని చెప్పారు. దివంగత ముఖ్యమంత్రి వైయస్ రాజశేఖరరెడ్డి సమాధి వద్ద ఆయన వై.ఎస్. జగన్మోహన రెడ్డి పార్టీ పేరును ప్రకటిస్తారని చెప్పారు.