తిరుపతి లడ్డూపై సిట్ విచారణ వద్దు.. సుప్రీం విచారణే ముద్దు.. వైకాపా

తిరుపతి లడ్డూ కల్తీ ఆరోపణలపై ప్రత్యేక దర్యాప్తు బృందం (సిట్) విచారణ జరిపినా నిజానిజాలు వెలికితీయలేమని, దీనిపై సుప్రీంకోర్టు పర్యవేక్షణలో విచారణ జరిపించాలని వైఎస్ఆర్ కాంగ్రెస్ పార్టీ డిమాండ్ చేసింది. లడ్డూ ప్రసాదంపై ముఖ్యమంత్రి చంద్రబాబు నాయుడు నిరాధార ఆరోపణలు చేస్తున్నారని మాజీ మంత్రి అంబటి రాంబాబు మండిపడ్డారు. 

గుంటూరులో ఆయన మీడియాతో మాట్లాడుతూ డీఐజీ ద్వారా విచారణకు ఆదేశించాలని ముఖ్యమంత్రి నాయుడు తీసుకున్న నిర్ణయం నవ్వు తెప్పిస్తోందన్నారు. ఈ అంశంపై సుప్రీంకోర్టు పర్యవేక్షణలో విచారణ జరగాలని ఆయన కోరారు. తిరుమల తిరుపతి దేవస్థానం (టిటిడి) మాజీ చైర్మన్ వై.వి.సుబ్బారెడ్డి భార్యపై చంద్రబాబు నాయుడు చేసిన వ్యాఖ్యలు నిరాధారమైనవని, మత విద్వేషాలు సృష్టించే ఉద్దేశంతో ఉన్నాయని ఆయన విమర్శించారు.

తల్లిదండ్రులు చనిపోయిన సమయంలో హిందూ సంప్రదాయాలను కూడా పాటించని చంద్రబాబు నాయుడు సనాతన ధర్మం గురించి ఎలా మాట్లాడతారని ప్రశ్నించారు. ఉప ముఖ్యమంత్రి పవన్‌కల్యాణ్‌ ప్రాయశ్చిత్త దీక్ష చేయడం వెనుక ఆంతర్యమేమిటని ప్రశ్నించారు. 

టీడీపీ హయాంలో దేవాలయాలు కూల్చివేసినప్పుడు ఎందుకు నోరు మెదపలేదని, దళిత ప్రొఫెసర్‌పై దాడి చేసిన జనసేన ఎమ్మెల్యేపై ఎందుకు చర్యలు తీసుకోలేదని ప్రశ్నించారు. లడ్డూను ఎక్కడ అపవిత్రం చేశారని, కల్తీ నెయ్యి ఉపయోగించారని ప్రశ్నిస్తూ శుద్ధి కర్మ చేయాలన్న ప్రభుత్వ వాదనను కూడా ఆయన దుయ్యబట్టారు.

బీజేపీ సీనియర్ నేత సుబ్రమణ్యస్వామి సూచించినట్లు తిరుమల లడ్డూ వ్యవహారంపై సుప్రీంకోర్టు పర్యవేక్షణలో విచారణకు చంద్రబాబు నాయుడు కానీ, పవన్ కల్యాణ్ కానీ ఎందుకు అంగీకరించడం లేదని అంబటి ప్రశ్నించారు.

ప్రాయశ్చిత్త దీక్ష చేస్తే క్రిమినల్ కేసులు తొలగిపోతాయా అంటూ అంబటి సెటైర్లు వేశారు. దళిత ప్రొఫెసర్‌పై దాడి చేసిన ఎమ్మెల్యే పంతం నానాజీపై క్రిమినల్ కేసు ఎందుకు పెట్టలేదో చెప్పాలన్నారు.

పవిత్రమైన తిరుమల లడ్డూను టీడీపీ నేతృత్వంలోని సంకీర్ణ ప్రభుత్వం రాజకీయ లబ్ధి కోసం వాడుకుంటుందని అంబటి ఆరోపించారు. పవన్ ఆలయ శుద్ధి కార్యక్రమాల్లో నిమగ్నమై హిందూ సంప్రదాయాలపై అసలు అవగాహన లేకుండా మాట్లాడుతున్నారని విమర్శించారు.