జనసేన పార్టీ అధినేత పవన్ కళ్యాణ్‌కు ఏపీ మంత్రి ఆర్కే.రోజా గట్టి కౌంటరిచ్చారు. మిస్టర్ పవన్.. ముందు మీరు సర్పంచ్‌గా గెలువు అంటూ సలహా ఇచ్చారు. ఎమ్మెల్యేగా గెలవలేని నీవు కూడా మా జాతకాలు చెబుతుంటే నవ్వొస్తుంది అంటూ హాస్యోక్తులు విసిరారు. జనసేన పార్టీ న్యాయ విభాగం విస్తృత స్థాయి సమావేశం ఆదివారం మంగళగిరిలో జరిగింది.
ఇందులో పవన్ కళ్యాణ్ పాల్గొని కీలక ప్రసంగం చేశారు. పనిలోపనిగా ఆయన వైకాపా ప్రభుత్వ తీరును ఎండగట్టారు. ఈ సందర్భంగా వచ్చే ఎన్నికల్లో వైకాపాకు 46 నుంచి 60 సీట్లకు మించి రావంటూ జోస్యం చెప్పారు. దీనిపై ఏపీ మంత్రి ఆర్.కె.రోజా సోమవారం గట్టిగా కౌంటరిచ్చారు.
ఎమ్మెల్యేగా గెలవలేని న్వువు మా జాతకం చెబుతుంటే నవ్వొస్తుంది అంటూ వ్యాఖ్యానించారు. మాకు 45 సీట్లు వస్తే మిగిలిన 130 సీట్లు మీకు వస్తాయా? అంటూ ప్రశ్నించారు. ముందు సర్పంచ్‌గా గెలవండి. ఆ తర్వాత ఎమ్మెల్యే గురించి ఆలోచించవచ్చు అంటూ ఎద్దేవా చేశారు.
అస్సలు ఏపీలోని 175 అసెంబ్లీ స్థానాల్లో పోటీ చేసేందుకు జనసేన పార్టీకి అభ్యర్థులు ఉన్నారా? అంటూ ఆమె నిలదీశారు. జగన్ సీఎఁ కాడు.. ఇదే నా శాపం అన్నావు.. శాసనం అన్నవాడ్ని శాసనసభలోకి కూడా రానివ్వడం లేదు ఈ విషయం మర్చిపోయావా? అంటూ ప్రశ్నించారు.
గతంలో ఎన్టీ రామారావు పార్టీ పెట్టి సింగిల్‌గా పోటీ చేశారన్న రోజా.. చిరంజీవి కూడా పార్టీ పెట్టి ఒంటరిగానే పోటీ చేశారని గుర్తుచేశారు. అదే రక్తం పంచుకుని పుట్టిన నువ్వు మాత్రం పార్టీ పెట్టావే గానీ, ఒంటరిగా ఎన్నికలకు వెళ్లావా? అని నిలదీశారు.