నంద్యాల : నంద్యాల ఆర్.జి.ఎం.కాలేజీలో ఇంజినీరింగ్ చదువుతున్న ఉషారాణి ఆత్మ‌హ‌త్య‌లో కొత్త కోణం వెలుగు చూసింది. కాలేజీలో కుర్రాళ్ళ ర్యాగింగ్ వ‌ల్ల ఉషారాణి ఆత్మ‌హ‌త్య‌కు పాల్ప‌డింద‌ని తొలుత అంద‌రూ భావించారు. కానీ, ఈ కిరాత‌కానికి ఒడిగ‌ట్టింది కాలేజీలోని ఒక లెక్చరరే అని సమాచారం. బుద్ధిగా పాఠాల చెప్పాల్సిన లెక్చర‌ర్ ఆమెను ప్రేమ పేరుతో వేధించినట్లు వార్తలు వస్తున్నాయి.
ఉషారాణి ఆర్.జి.ఎం. కాలేజీలో ఇంజ‌నీరింగ్ ఫ‌స్ట్ ఇయ‌ర్ చ‌దువుతోంది. కుంద‌న‌పు బొమ్మ‌లా ఉన్న ఆమె కాలేజీలో చేరిన‌ప్ప‌టి ఓ లెక్చర‌ర్ ఆమెపై క‌న్నేశాడని సమాచారం. ఉషారాణి ఉంటున్న హాస్ట‌ల్ లోని రూమ్‌మేట్స్‌ని మ‌చ్చిక చేసుకుని, వారితో సెల్ ఫోన్లో ఉషను అశ్లీల ఫోటోలు తీయించినట్లు వార్తలు వినిపిస్తున్నాయి.
ఆ తర్వాత ఆ ఫోటోలతో ఆమెనే బ్లాక్ మెయిల్ చేసి, లొంగ‌దీసుకునే ప్ర‌య‌త్నం చేశాడనీ, లెక్చర‌ర్ వేధింపులను త‌ట్టుకోలేక ఉష నంద్యాల నుంచి త‌న స్వగ్రామానికి బ‌ద్వేలుకు బయలుదేరింది. ఐతే మార్గ‌మ‌ధ్య‌మంలోనే పురుగుల మందు తాగింది. కుటుంబ సభ్యులు ఉషను వెంటనే కడప ఆసుపత్రికి తరలించారు. ఆయితే ఆమె అప్పటికే చనిపోయినట్లు డాక్టర్లు నిర్ధారించారు.
ఐటీ విభాగంలో మొదటి సంవత్సరం చదువుతున్న ఉష త‌న స‌న్నిహితుల‌తో ఈ సంగ‌తి చెప్పుకొంద‌ని సమాచారం. చివరకు ఎటూ పాలుపోక ప్రాణత్యాగానికి పాల్పడినట్లు తెలుస్తోంది. అన్నిటికీ మించి ఉష ఓ ప్రజాప్రతినిధికి చెల్లెలు. బద్వేలు జడ్పీటీసీగా ఉన్న శిరీషకు ఉష స్వయానా చెల్లెలు. ఓ ప్రజాప్రతినిధి చెల్లెలికే కాలేజీల్లో రక్షణ లేనప్పుడు ఇక సామాన్యుల ప‌రిస్థితి ఏమిట‌ని అమ్మాయిల త‌ల్లితండ్రులు ఆగ్ర‌హం వ్య‌క్తం చేస్తున్నారు.