క్యాబ్ డ్రైవర్లు, ఆటో డ్రైవర్లు మహిళలపై వేధింపులకు దిగుతున్నారు. మొన్నటికి మొన్న క్యాబ్‌లో ఎక్కిన మహిళను వేధించిన కారు డ్రైవర్ అరెస్టయ్యాడు. తాజాగా ఓ ఆటో డ్రైవర్ ఆటోలో ఎక్కిన యువతిపై లైంగిక దాడికి యత్నించాడు. ఈ ఘటన విజయనగరంలోని బొబ్బిలి, కోమటిపల్లిలో చోటుచేసుకుంది.
వివరాల్లోకి వెళితే.. వివాహిత స్వాతి తన సోదరి పావనితో కలిసి బొబ్బిలి పట్టణానికి షాపింగ్‌కి వచ్చారు. అనంత‌రం చర్చి సెంటర్‌కి వెళ్లేందుకు ఆటో ఎక్కారు. ఆటో డ్రైవర్ నరేష్‌ (35) జగన్నాథపురంలోకి ఆటో రాగానే స్వాతిపై లైంగిక దాడి చేయబోయాడు.
అయితే అక్కాచెల్లళ్లు తీవ్రంగా ప్రతిఘటించారు. అంతే ఇక వారిని చంపేందుకు ఆటోడ్రైవర్ ప్రయత్నించాడు. వారిని ఇనుప రాడ్‌తో బాదాడు. ఆపై ఆటో డ్రైవర్ నుంచి తప్పించుకునేందుకు అక్కాచెల్లెళ్లు ఆటో నుంచి దూకేశారు. ఈ ఘటనలో స్వాతి కోమాలోకి వెళ్లిపోగా, పావని స్వల్ప గాయాలకు గురైంది.
ఈ ఘటనపై స్థానికుల సమాచారం మేరకు పోలీసులు నిందితుడి అదుపులోకి తీసుకున్నారు. ఆటో డ్రైవర్ నరేష్‌పై పలు కేసులున్నాయని పోలీసులు తెలిపారు. ఇక గాయపడిన అక్కాచెల్లెళ్లు ఆస్పత్రిలో చికిత్స పొందుతున్నారు.