స్కిల్ కేసులో చంద్రబాబు బెయిల్ రద్దు చేయండి : సుప్రీంలో ఏపీ సర్కారు పిటిషన్

స్కిల్ డెవలప్‌మెంట్ కేసులో టీడీపీ అధినేత నారా చంద్రబాబు నాయుడుకు ఏపీ హైకోర్టు మంజూరు చేసిన బెయిల్‌ను రద్దు చేయాలని కోరుతూ ఏపీ ప్రభుత్వం సుప్రీంకోర్టును కోరింది. ఈ పిటిషన్‌పై విచారణ జరిపిన కోర్టు గతంలో విచారణను వాయిదా వేసింది. సీనియర్ న్యాయవాది హరీశ్ సాల్వే అందుబాటులో లేరని కోర్టుకు మరో న్యాయవాది సిద్ధార్థ లూథ్రా తెలుపుతూ, మూడు వారాలు సమయం కావాలని కోరారు. దీనికి ఏపీ సీఐడీ న్యాయవాది అభ్యంతరం వ్యక్తం చేశారు.

గతంలో కౌంటర్ దాఖలు చేయడానికి ఇలాగే సమయం తీసుకున్నారని, ఇపుడు కూడా మళ్లీ వాయిదా కోరుతున్నారని ఆరోపించారు. చంద్రబాబు తరపున ఇప్పటికే కౌంటర్ దాఖలు చేసినందుకు వీలైనంత త్వరలో తదుపరి విచారణ చేపట్టాలని తేదీని నిర్ణయించాలని సుప్రీం ధర్మాసనాన్ని రంజిత్ కుమార్ కోరారు. ఇరుపక్షాల వాదనలు ఆలకించిన జస్టిస్ పంకజ్ మిట్టల్, జస్టిస్ బేలా ఎం త్రివేది తదుపరి విచారణను ఈ నెల 26వ తేదీకి వాయిదా వేసింది. నిజానికి రెండు వారాల తర్వాత లిస్ట్ చేయాలని ధర్మాసనం భావించినప్పటికీ ఏపీ సీఐడీ న్యాయవాది విజ్ఞప్తితో ఈ నెల 26వ తేదీకి వాయిదా వేసింది.