పెన్సిల్‌పై అద్భుతమైన కళాఖండాలు రూపొందిస్తూ ఔరా అనిపిస్తున్నాడు.. ఉమ్మడి విశాఖ జిల్లా నక్కపల్లి మండలం చిన్న దొడ్డిగల్లు గ్రామానికి చెందిన వెంకటేష్. ఇతను అమెరికాలో వుంటున్నాడు. సందర్భానుసారం సూక్ష్మ కళారూపాలు చేయడం ఆతని హాబీ.
తాజాగా 18 మిల్లీ మీటర్ల ఎత్తు, 8 మిల్లీ మీటర్ల వెడల్పుతో ఈ మైక్రో ఆర్ట్ చేశాడు వెంకటేష్. పది గంటల పాటు శ్రమించి అద్భుతమైన కళాఖండాన్ని రూపొందించానని అంటున్నాడు. మహాశివరాత్రి పర్వదినం సందర్భంగా పెన్సిల్ మొనపై అతి సూక్ష్మంగా శివుడి కళా రూపం చెక్కి ఔరా అనిపించాడు.
తలపై సగం మిగిలిన నెలవంక, మేడలో హారంగా విష సర్పం, చేతిలో త్రిశూలం.. కాలి కింద పులి చర్మం.. ఒంటి కాలుపై శివతాండవం చేస్తున్నట్టు మహాశివుడు నాట్య రూపంలో దర్శనమిస్తున్నాడు. ఈ శిల్పం ప్రస్తుతం నెట్టింట వైరల్ అవుతోంది.
అలాగే మహా శివరాత్రి ఉత్సవాల నేపథ్యంలో గుంటూరు జిల్లాలోని పేరేచర్ల కైలాసగిరి క్షేత్రం ఉత్సవ కమిటీ 1008 కిలోలతో శివలింగాన్ని తయారు చేశారు. అయితే దీనిని లడ్డూ బూందీతో తయారుచేయడం దీని స్పెషల్.
5 అడుగుల వెడల్పు, 6 అడుగుల ఎత్తుతో దీనిని రూపొందించినట్లు తెనాలి మిర్చి స్నాక్స్‌ నిర్వాహకులు తెలిపారు. తెనాలి పట్టణం చెంచుపేటలోని వ్యాపార కేంద్రం వద్ద దీన్ని ప్రదర్శించడంతో ప్రజలంతా ఆసక్తిగా తిలకిస్తున్నారు.
