తమకు ఇష్టం లేని పెళ్లి చేసుకుందన్న ఆగ్రహంతో దారుణానికి ఒడిగట్టారు ఆమె తల్లి, సోదరి. వివరాల్లోకి వెళితే... నాగర్ కర్నూల్ జిల్లా కల్వకుర్తిలోని జంగారెడ్డిపల్లికి చెందిన 19 ఏళ్ల సునీత అదే గ్రామానికి చెందిన 23 ఏళ్ల రవికుమార్ ప్రేమించుకున్నారు. ఐతే వీరి వివాహానికి ఇరు కుటుంబాల పెద్దలు అంగీకరించలేదు. కానీ పెద్దలను ఎదిరించి వివాహం చేసుకున్నారు.
సునీత గర్భవతి అయ్యింది. ఆమెకి 8వ నెల కావడంతో వైద్యులు పూర్తి విశ్రాంతి అవసరమని చెప్పారు. దీనితో రవికుమార్ తన భార్య సునీతను సమీప బంధువుల ఇంటి వద్ద వుంచి ఆమె ఆరోగ్యాన్ని చూసుకుంటున్నాడు. ఈ విషయం తెలిసిన సునీత తల్లి, ఆమె సోదరి.... రవికుమార్ ఇంట్లో లేని సమయంలో వచ్చారు.
ఆసుపత్రిలో చూపిస్తామని నమ్మించి తీసుకుని వెళ్లారు. అక్కడ ఆమెకి ఆపరేషన్ చేయించి బిడ్డను తొలగించేసారు. తన భార్యను ఆమె పుట్టింటివారు తీసుకెళ్లారని తెలుసుకున్న రవికుమార్, హుటాహుటిన ఆసుపత్రికి వెళ్లేసరికి ఘోరం జరిగిపోయింది. అతడు పోలీసులకు ఫిర్యాదు చేశాడు. కేసు నమోదు చేసుకున్న పోలీసులు బాధితురాలి తల్లి, సోదరిని అరెస్టు చేసారు. వైద్యురాలితోపాటు సహకరించిన మరో 8 మంది పరారీలో వున్నారు.
