విశ్వనటుడు కమల్ హాసన్ కీలక నిర్ణయం తీసుకున్నారు. 'బిగ్ బాస్ అల్టిమేట్' నుంచి ఆయన హోస్ట్‌గా తప్పుకున్నారు. 24 గంటల పాటు నిరంతరాయంగా ప్రసారమయ్యేలా బిగ్ బాస్ అల్టిమేట్ పేరుతో హాట్‌ స్టార్‌లో ఇది ప్రసారమవుతుంది. ఈ కార్యక్రమం నుంచి ఆయన తప్పుకున్నారు. ఈ విషయాన్ని కమల్ హాసన్ ఆదివారం అధికారికంగా వెల్లడించారు.
అయితే, ఈయన ఇలాంటి నిర్ణయం తీసుకోవడానికి బలమైన కారణం లేకపోలేదు. యువ దర్శకుడు లోకేశ్ కనకరాజ్ దర్శకత్వంలో తన సొంత నిర్మాణ సంస్థ రాజ్‌కమల్ ఫిల్మ్ ఇంటర్నేషనల్ పతాకంపై 'విక్రమ్' చిత్రాన్ని నిర్మిస్తున్నారు. ఈ చిత్రం వివిధ కారణాల రీత్యా ఆలస్యమవుతూ వస్తుంది. ఈ చిత్రం ప్రస్తుతం చివరి దశ షెడ్యూల్ జరుపుకుంటుంది.
పైగా, ఏప్రిల్ నెలాఖరులో విడుదల చేయాలని ప్లాన్ చేస్తున్నారు. దీంతో ఈ చిత్రం షూటింగ్‌తో పాటు పోస్ట్ ప్రొడక్షన్ నిర్మాణ పనులను త్వరితగతిన పూర్తిచేసేందుకు వీలుగా ఆయన ఈ నిర్ణయం తీసుకున్నారు. విక్రమ్ షూటింగ్, బిగ్ బాస్ షెడ్యూళ్ళ మధ్య సమస్యలు తలెత్తకుండా ఉండేందుకు ఈ నిర్ణయం తీసుకున్నట్టు తెలిపారు. ఇది కేవలం బ్రేక్ మాత్రమేనని, బిగ్ బాస్ సీజన్-6లో మళ్లీ అందర్నీ కలుస్తానని కమల్ హాసన్ ప్రకటించారు.
