బాలీవుడ్ హీరోయిన్ మలైకా అరోరా. ఈమె బాలీవుడ్ స్టార్ హీరో సల్మాన్ ఖాన్ సోదరుడు అర్ఫాజ్ ఖాన్‌ను పెళ్లి చేసుకుంది. వీరిద్దరూ 19 యేళ్లపాటు వైవాహిక జీవితాన్ని గడిపారు. ఫలితంగా వీరికి 17 యేళ్ల కుమారుడు కూడా ఉన్నాడు. అయితే, భార్యాభర్తల మధ్య ఏర్పడిన మనస్పర్థల కారణంగా విడిపోయారు. అర్ఫాజ్ ఖాన్‌తో విడాకులు తీసుకున్న తర్వాత మలైకా అరోరా బాలీవుడ్ యువ నటుడు అర్జున్ కపూర్‌తో ప్రేమలోపడింది. ఆ తర్వాత వీరిద్దరూ ఏకంగా సహజీవనం చేస్తున్నారు. ఈ ప్రేమ పక్షులు విదేశీ పర్యటనలు, ఫంక్షన్లకు చెట్టాపట్టాలేసుకుని తిరుగుతున్నారు.
ప్రస్తుతం లాక్‌డౌన్ సమయంలో ఇంట్లోనే ఈ ప్రేమ జంట గడుపుతోంది. ఈ నేపథ్యంలో మలైకా అరోరా చిట్‌చాట్‌లో పాల్గొంది. ఈ సందర్భంగా అర్జున్ కపూర్‌తో పెళ్లి వ్యవహారం ఏంటని ప్రశ్నించగా ఆమె ఏమాత్రం తడుముకోకుండా సమాధానమిచ్చింది.
'పెళ్లిదేముంది.. ఏదో ఒక సమయంలో నిర్ణయం తీసుకుంటాం. ఇప్పుడు ఏ స్థితిలో ఉన్నామో మాకు తెలుసు. పరిస్థితులు అనుకూలిస్తే త్వరగానే మా నిర్ణయం చెబుతాం. అప్పటివరకు ఏదీ చెప్పలేన'ని మలైకా తెలిపింది. ఇక, పిల్లల గురించి అడిగిన ప్రశ్నకు మలైకా సమాధానం ఇవ్వలేదు.
