తెలంగాణలో బీఆర్ఎస్ చీఫ్ కె. చంద్రశేఖర్ రావు (కెసిఆర్) రాజకీయ శకం ముగిసిందని తెలంగాణ ప్రదేశ్ కాంగ్రెస్ కమిటీ (టిపిసిసి) అధ్యక్షుడు మహేష్ కుమార్ గౌడ్ అన్నారు. తెలంగాణ ఉద్యమ నాయకుడిగా మాత్రమే కేసీఆర్ గౌరవించబడతారని, కేసీఆర్ అలా చెప్పినంత మాత్రాన రాష్ట్రంలో కాంగ్రెస్ పార్టీ ప్రజాదరణ తగ్గుతుందా అని ప్రశ్నించారు.
నిజామాబాద్‌లో మీడియాతో మాట్లాడిన మహేష్ కుమార్ గౌడ్, తెలంగాణ ప్రజలు కాంగ్రెస్ పార్టీ వెనుక దృఢంగా ఉన్నారని ఉద్ఘాటించారు. "ప్రజలు మాతో నిలబడినప్పుడు మా ప్రజాదరణ ఎలా తగ్గుతుంది?" అని అడిగాడు. కేసీఆర్‌ను విమర్శిస్తూ, "ఎవరైనా ఫామ్‌హౌస్‌లో కూర్చుని, పెన్ను, కాగితంతో గ్రాఫ్‌లు గీసి, రాష్ట్రంలో కాంగ్రెస్ పార్టీ స్థానాన్ని నిర్ణయించగలరా?" అని మహేష్ కుమార్ గౌడ్ ప్రశ్నాస్త్రాలు సంధించారు.
56శాతం వెనుకబడిన తరగతులు (బీసీలు) కాంగ్రెస్ పార్టీకి మద్దతు ఇస్తున్నారని ఆయన పేర్కొన్నారు. ప్రభుత్వం తన మొదటి సంవత్సరంలో సాధించిన విజయాలను హైలైట్ చేస్తూ, "మేము 56,000 ఉద్యోగాలను కల్పించాము వ్యవసాయ రుణ మాఫీతో సహా కీలక వాగ్దానాలను నెరవేర్చాము. మా ప్రజాదరణ తగ్గుతోందని ఎవరైనా ఎలా చెప్పగలరు? కేసీఆర్ రాజకీయ ప్రభావం పూర్తిగా కుప్పకూలిపోయి ఇప్పుడు ఆయన ఫాంహౌస్ కే పరిమితమయ్యారని మహేష్ కుమార్ గౌడ్ ఆరోపించారు.
రాబోయే రోజుల్లో భారత రాష్ట్ర సమితి పూర్తిగా తుడిచిపెట్టుకుపోతుందని మహేష్ జోస్యం చెప్పారు. ఆ పార్టీలో కేసీఆర్, ఆయన కుమారుడు మాత్రమే ఉంటారని ఎద్దేవా చేశారు. తిరిగి అధికారంలోకి వస్తామని కేసీఆర్ పగటి కలలు కంటున్నారని విమర్శించారు. రాజకీయాల నుంచి ఆయన శాశ్వతంగా విరమించుకోవాలని సూచించారు.
రాబోయే పట్టభద్రుల నియోజకవర్గ ఎన్నికలను ప్రస్తావిస్తూ, అభ్యర్థిని నిలబెట్టడానికి బిఆర్‌ఎస్‌కు బలం లేదని మహేష్ కుమార్ గౌడ్ సెటైర్లు విసిరారు. గ్రాడ్యుయేట్ ఎన్నికల్లో కూడా పోటీ చేయలేని పార్టీ తిరిగి అధికారంలోకి వస్తుందని చెప్పడం విడ్డూరంగా ఉందని చెప్పుకొచ్చారు.
