దేశ రాజధాని ఢిల్లీలో కాల్పులు కలకలం సృష్టించాయి. గురువారం రాత్రి పొద్దుపోయిన తర్వాత ఉత్తర ఢిల్లీలోని బారా హిందూరావ్‌ ప్రాంతంలో గుర్తు తెలియని వ్యక్తులు కాల్పులు జరిపారు. దీంతో ఇద్దరు వ్యక్తులు మరణించారు.
ఈ వివరాలను పరిశీలిస్తే, ముజీబ్‌ అనే ప్రాపర్టీ డీలర్‌ ఈద్గా ప్రాంతంలో నివసిస్తుంటాడు. ఈయన మేనమామకు రాణి ఝాన్సీ రోడ్డులోని ఫిలిమిస్తాన్‌లో ఓ క్లినిక్ ఉంది. గురువారం రాత్రి వారు క్లినిక్‌‌కు తాళం వేసి ఇంటికి వెళ్లేందుకు సిద్ధమయ్యారు.
క్లినిక్ షట్టర్‌కు తాళం వేసి వారిద్దరూ కారులో కూర్చోగానే.. ఓ యువకుడు వచ్చి వారి కారుకు అడ్డంగా నిల్చున్నాడు. అనంతరం మరో వ్యక్తి కూడా వచ్చాడు. జరగబోయే ప్రమాదాన్ని గుర్తించిన మామా అల్లుళ్లు కారులో నుంచి ప్రాణాలను అరచేతిలో పట్టుకుని పారిపోయారు.
అయినప్పటికీ దుండుగులు వారిని వదిలిపెట్టలేదు. వారిపై కాల్పులు జరపారు. అయితే, ఆ సమంయలో అటుగా వెళ్తున్న వారికి ఆ బుల్లెట్లు తగలడంతో ఇద్దరు మరణించారని పోలీసులు తెలిపారు.
మృతుల్లో ఒకరిని గుర్తించామని, మరొకరు ఎవరనే విషయం ఇంకా తెలియలేదని వెల్లడించారు. కాగా, ఐదు నుంచి ఆరుగురు ఈ కాల్పులకు తెగబడ్డారని, వారికోసం గాలిస్తున్నామని తెలిపారు. ఈ ఘటనపై కేసు నమోదు చేశామని, దర్యాప్తు చేస్తున్నామని వెల్లడించారు.
