మనిషన్నాక ఏదో ఒక జబ్బు ఎప్పుడో ఒకప్పుడు వేధిస్తూనే ఉంటుంది. వాటిలో ముఖ్యమైన సమస్య రక్తపోటు.. అదే బీపి. చాలామంది నెలకు రెండు మూడు సార్లైనా బీపీ చెక్ చేసుకుంటుంటారు. ఐతే బీపీ ఎక్కువగా ఉందని బాధపడుతుంటారు. కానీ బీపీ పరీక్షించుకోబోయే ముందు కొన్ని జాగ్రత్తలు పాటించాలంటున్నారు వైద్యులు.
1. బీపీ పరీక్ష చేయించుకునేటప్పుడు మీరు కూర్చునే విధానం ప్రధాన పాత్ర పోషిస్తుంది. మీ వెనకాల సపోర్టు తప్పనిసరిగా ఉండాలి. కుర్చీలో వెనక్కి ఆనుకుని కూర్చోవాలి. పాదాలను రెండింటిని నేలపై ఆనించి ఉంచాలి. బీపీ చూసే చేతిని టేబుల్‌పై విశ్రాంతిగా ఉంచాలి. మోచేతి‌పై భాగం ఛాతి మధ్య భాగానికి వచ్చేలా చేతినివుంచాలి.
2. రక్త పరీక్ష చేయించుకోవడానికి వెళ్ళేముందు కనీసం అరగంటకు ముందు‌గానే కాఫీలు , టీలు, సిగరెట్లు తీసుకోకూడదు. ఇవన్నీ తాత్కాలికంగా బీపీని పెంచుతాయి.
3. పరీక్ష చేయించుకునేటప్పుడు ఎవరూ మాట్లాడకూడదు. మాట్లాడినా, విన్నా మనకు తెలియకుండానే స్వల్ప వత్తిడి పెరుగుతుంది. దీని వలన ఖచ్ఛితమైన బీపీ విలువ తెలుసుకోవడం సాధ్యం కాదంటున్నారు వైద్యనిపుణులు.
4. ఆందోళనలూ పెట్టుకోకూడదు. ఆ సమయంలో మూత్రవిసర్జనను ఆపుకోవడంలాంటి చిన్నచిన్న వత్తిళ్లకు కూడా దూరంగా వుండాలి.
5. రెండు చేతులకూ పరీక్ష చేయించడం ఉత్తమం. రెండింటికీ నడుమ కనీసం 20 పాయింట్లు తేడా రావచ్చు. రెండింటిలోనూ ఎక్కువగావున్న దాన్ని పరిగణనలోకి తీసుకుంటామని వైద్యనిపుణులు పేర్కొంటున్నారు.
