చాలా మంది యువతులు, మహిళలు అవాంఛిత రోమాల సమస్యతో బాధపడుతుంటారు. ఈ రోమాలను షేవ్ చేసి తొలగిస్తుంటారు. అలా షేవ్ చేసిన మరుసటి రోజే వెంట్రుకలు వస్తుంటాయి. ఇలా వస్తున్నాయంటే షేవ్ చేసే పద్ధతిలోనే ఏదో లోపం ఉన్నట్టుగా భావించాలి. ఈ సమస్య నుంచి గట్టెక్కాలంటే.. షేవ్ చేస్తున్నపుడు... షేవ్ చేసిన తర్వాత కొన్ని జాగ్రత్తలు పాటించాల్సివుంటుంది. అవేంటో ఓసారి పరిశీలిద్ధాం.
* అవాంచిత రోమాలను షేవ్ చేసేందుకు సాధ్యమైనంతవరకు కొత్త బ్లేడ్‌నే ఉపయోగించాలి. చర్మానికి దగ్గరగా, నున్నటి షేవింగ్ కోసం పదును తగ్గని బ్లేడ్‌ను ఉపయోగించాలి. వెంట్రుకలు పెరిగే తీరు ఒక్కొక్కరిలో ఒక్కోలా ఉంటుంది. కాబట్టి 5-6 షేవ్‌ల వరకే బ్లేడ్‌ను ఉపయోగిస్తే మంచిది.
* అవసరమైనంత మేరకే సున్నితంగా ఒత్తిడిని పెంచి షేవ్ చేయాలి. ఏ దిశలో షేవింగ్ సౌకర్యంగా ఉంటే ఆ దిశనే అనుసరించాలి. బికిని, ఇతర సున్నిత ప్రదేశాల్లో షేవ్ చేసేటప్పుడు రోండోసారి జెల్‌ అప్లై చేసి నురగ వచ్చిన తర్వాతే షేవ్ చేయాలి.
* ప్రత్యేకంగా అవాంఛిత రోమాలను తొలగించడానికి ఉద్దేశించిన రేజర్లనే ఎంచుకోవాలి. అడుగునున్న కొత్త చర్మంపైకి వచ్చేలా పైచర్మపు కణాల్ని కూడా తొలగించే షేవర్ వాడితే మంచిది.
* షేవ్‌కు ముందు స్నానం చేయడం వల్ల చర్మంలో ఉండే సహజ నూనెలు, చెమట వదిలిపోతాయి. ఆ ప్రదేశంలోని వెంట్రుకలు తేమతో మెత్తబడి తేలికగా ఊడివస్తాయి. ఇందుకోసం షేవింగ్ చేయాలనుకున్న ప్రదేశాలను 3 నిమిషాలపాటు తడిపితే సరిపోతుంది.
* షేవ్ తర్వాత ఆ ప్రదేశాలను ఎక్కువ నీళ్లతో కడిగి నెమ్మదిగా తుడవాలి. మాయిశ్చరైజర్ చర్మంలోకి పీల్చుకోవాలంటే కొంత తేమగానే ఉండాలి. ఇలాంటి చర్మం మీద మాయిశ్చరైజర్ అప్లై చేయడం వల్ల పొడిగా ఉండే చర్మకణాలు రాలిపోయి చర్మం కాంతులీనుతూ ఉంటుంది.
