అక్రమ సంబంధం మరో ప్రాణాన్ని తీసుకుంది. భర్త ఎప్పుడూ పనుల నిమిత్తం తిరగడంతో కోర్కెను చంపుకోలేక ఒక వివాహిత ఏకంగా డ్రైవర్‌తో అక్రమ సంబంధం పెట్టుకుంది. అది కాస్త సంవత్సరం వరకు ఎవరికీ తెలియకుండా జాగ్రత్త పడింది. కానీ చివరకు భర్తతో పాటు సొంత తమ్ముడికి వ్యవహారం తెలిసిపోయింది.
కర్నూలు జిల్లా సున్నిపెంట గ్రామంలో నివాసముంటున్న రియల్ ఎస్టేట్ వ్యాపారి అరవింద్‌కు, రాణికి సంవత్సరన్నర క్రితం వివాహమైంది. వీరికి పిల్లలు లేరు. చుట్టుప్రక్కల జిల్లాలో స్థలాలను విక్రయిస్తూ అరవింద్ బాగానే సంపాదించాడు. ఆర్థికంగా వీరి కుటుంబం నిలదొక్కుకుంది.
అరవింద్ ఇంట్లో కారు డ్రైవర్‌గా చేరాడు నాగభూషణం. భర్త ఎప్పుడూ రియల్ ఎస్టేట్ వ్యాపారం నిమిత్తం బయట తిరుగుతుండటంతో రాణి, నాగభూషణంకు దగ్గరైంది. వీరి వ్యవహారం కాస్త సంవత్సరం వరకు బాగానే సాగింది. అయితే రాణి తమ్ముడు నిఖిల్ డిగ్రీ పూర్తి చేసుకుని అక్క ఇంట్లో కొన్ని రోజులు ఉండేందుకు వచ్చాడు. రాణి, నాగభూషణంల వ్యవహారం నిఖిల్‌కు తెలిసిపోయింది. అక్కను ఏమీ అనలేక విషయాన్ని బావకు చెప్పాడు.
దీంతో నిఖిల్‌ను వెంటపెట్టుకుని వెళ్ళిన అరవింద్ అతనికి పూటుగా మద్యం పోశాడు. నాగభూషణంను చంపేస్తే మీ అక్కతో కాపురం చేస్తా.. లేకుంటే మిమ్మల్ని రోడ్డుకు లాగుతానంటూ బెదిరించాడు. అక్క కాపురాన్ని నిలబెట్టడానికి నాగభూషణంను శ్రీశైలం ప్రాజెక్టుకు సమీపంలోని నిర్మానుష్య ప్రాంతానికి తీసుకెళ్ళి చంపేశాడు నిఖిల్. వారం రోజుల క్రితం ఘటన జరిగితే పోలీసులు నిందితుల కోసం గాలించారు. అయితే పోస్టుమార్టంలో నిఖిల్ వేలిముద్రలు సరిపోవడంతో అతన్ని అదుపులోకి తీసుకుని విచారిస్తే అసలు విషయం బయటపడింది. నిందితులను పోలీసులు అదుపులోకి తీసుకున్నారు.
