బాలీవుడు యువ హీరో సుశాంత్ సింగ్ రాజ్‌పుత్. సినీ ఇండస్ట్రీలోని బంధుప్రీతి (నెపోటిజం) కారణంగా బలవన్మరణానికి పాల్పడ్డాడు. ఈ యువ హీరో మృతిపట్ల బాలీవుడ్ సినీ ఇండస్ట్రీకి చెందిన ప్రముఖులు ఇప్పటికీ తేరుకోలేకపోతున్నారు. ఈ పరిస్థితుల్లో సుశాంత్ వీరాభిమాని ఒకరు ఓ నక్షత్రాన్ని కొనుగోలు చేసి, దానికి సుశాంత్ అని నామకరణం చేశాడు. పైగా, "ఆ తార మరింత ప్రకాశవంతంగా మెరవాలి" అంటూ ట్వీట్ చేశారు.
సుశాంత్ ఇష్టాలు తెలిసిన ఒక అభిమాని ఆయనకు గొప్పగా నివాళి ప్రకటించారు. అమెరికాకు చెందిన రక్ష అనే అభిమాని ఒక నక్షత్రాన్ని కొనుగోలు చేసి దానికి సుశాంత్ పేరు పెట్టారు. అందుకు సంబంధించిన రిజిస్ట్రేషన్ పత్రాన్ని ట్విట్టర్‌‌లో పోస్ట్ చేసి తన అభిమానాన్ని చాటుకున్నారు.
'సుశాంత్ అద్భుతమైన వ్యక్తి. అతనికి నివాళులు అర్పించడంలో కొంత ఆలస్యం చేశాను. ఈ చీకటి ప్రపంచంలో ఆయన ఒక స్వచ్ఛమైన రత్నం లాంటివాడు. ఆయన మరింతగా మెరవాలి. ఆయన పేరు మీద ఉన్న నక్షత్రాన్ని ఆయన టెలిస్కోప్‌తో కొనడం చాలా సంతోషంగా ఉంది. ఇక నుంచి ఆ తార మరింత ప్రకాశవంతంగా మెరువాలి' అని రక్ష అనే అభిమాని ట్వీట్ చేశారు.
విశ్వంలో ఉండే తారల్లో ఒకటైన ఆర్ఏ 22.121కు జూన్ 25,2020 నుంచి సుశాంత్ సింగ్ రాజ్‌పుత్‌గా నామకరణం చేశారు. ఆ మేరకు ఖగోళశాస్త్ర సంస్థ మాకు హక్కులు కల్పించింది. ఆ తారకు సంబంధించిన హక్కులు, కాపీరైట్స్ మాకు లభించాయి అని కూడా రక్ష పేర్కొన్నారు. చంద్రమండలంపై కూడా సుశాంత్ భూమిని కొనుగోలు చేసిన సంగతి తెలిసిందే.
