చైనాలోని వుహాన్ నగరంలో పుట్టిన కరోనా వైరస్ ప్రపంచ దేశాలకు వ్యాపించిన సంగతి తెలిసిందే. కరోనా సోకిన వ్యాధిగ్రస్థులను చూస్తే ఆమడ దూరంలో పారిపోతున్నారు జనం. అలాంటిది కరోనా బాధితులను పక్కనుండి చూస్తూ వారికి సేవలు అందిస్తున్నారు వైద్యులు, నర్సులు. దీంతో వారిలో కొందరు కరోనా బారిన పడుతున్నారు.
ఈ నేపథ్యంలో కరోనా వైరస్ బారిన పడిన ఓ డాక్టర్‌ ఆత్మహత్య చేసుకున్న ఘటన ఫ్రాన్స్‌లో చోటుచేసుకుంది. కరోనా వైరస్ ఫ్రాన్స్‌లో విజృంభిస్తుండటంతో ఇప్పటివరకూ ఎనిమిది వేలకు మందికి పైగా మృత్యువాత పడ్డారు.
ఫ్రెంచ్‌ ఫుట్‌బాల్‌లో భాగంగా ఓ క్లబ్‌ జట్టుకు డాక్టర్‌గా ఉన్న బెర్నార్డ్‌ గోంజ్‌లెజ్‌ ఆత్మహత్యకు పాల్పడ్డాడు. ఫ్రెంచ్‌ ఫుట్‌బాల్‌ క్లబ్‌ జట్టైన లిగీ-1 రీమ్స్‌ డాక్టర్‌ బెర్నార్డ్‌ గోంజెలెజ్‌కు కరోనా వైరస్ సోకింది. గత కొన్ని రోజులుగా అనారోగ్యానికి గురైన అతనికి టెస్టుల్లో కరోనా పాజిటివ్‌ రావడంతో బలవన్మరణానికి పాల్పడ్డాడు. ఇది ఆ దేశ ఫుట్‌బాల్‌ రంగాన్ని కలవరపాటుకు గురిచేసింది.
ఇక తాను బ్రతకనని భావించే ఈ ఆత్మహత్యకు పాల్పడి ఉండవచ్చని రీమ్స్‌ మేయర్‌ అర్మౌడ్‌ రాబినెట్‌ అనుమానం వ్యక్తం చేశారు. తమ ఫుట్‌బాల్‌ కుటుంబం ఒక మంచి డాక్టర్‌ను కోల్పోయిందని ఆవేదన వ్యక్తం చేశారు.
