సాధారణంగా కొందరు వైద్యులు తమ విధుల్లో నిర్లక్ష్యపూరితంగా వ్యవహరిస్తుంటారు. అలాంటి వారు చేయాల్సిన ఆపరేషన్ కాకుండా మరో ఆపరేషన్ చేస్తుంటారు. తాజాగా అలాంటి విచిత్ర ఆపరేషన్ ఒకటి జరిగింది. నత్తి పోయేందుకు ఆపరేషన్ చేయమంటే.. సున్తీ ఆపరేషన్ చేశారు. ఈ ఘటన ఉత్తరప్రదేశ్ రాష్ట్రంలో జరిగింది. రెండున్నరేళ్ల చిన్నారికి ఒక సమస్యకు బదులు మరో సమస్యకు చికిత్స చేశారు.
జిల్లా ముఖ్య వైద్యాధికారి వెల్లడించిన వివరాల మేరకు.. ఓ కుటుంబ సభ్యులు తమ రెండున్నరేళ్ళ కుమారుడికి నత్తి సమస్యను పరిష్కరించే నిమిత్తం ఖాన్ ఆస్పత్రి వైద్యులను సంప్రదించారు. అక్కడ నాలుక సర్జరీ చేయించుకునేలా ప్లాన్ చేశారు. కానీ, వైద్యులు నాలుకకు చికిత్స చేయకుండా కుమారుడికి సున్తీ ఆపరేషన్ చేశారని సదరు కుటుంబ సభ్యులు వెల్లడించారు.
ఈ విషయం వెలుగులోకి రాగానే ముగ్గురు సభ్యుల వైద్య బృందాన్ని పంపించి విచారణ జరిపిస్తున్నామని, ఈ ఆరోపణల్లో నిజమని తేలితే కఠిన చర్యలు తీసుకుంటామని హెచ్చరించారు. దీనిపై యూపీ ఉప ముఖ్యమంత్రి, ఆరోగ్య మంత్రి బ్రషేష్ పాఠక్ కూడా ఆగ్రహం వ్యక్తం చేశారు. ఆరోపణలు రూఢీ అయితే ఆపరేషన్ చేసిన వైద్యులతో పాటు హాస్పిటల్‌కు వ్యతిరేకంగా ఎఫ్ఐఆర్ నమోదు చేయాలని ఆదేశాలు జారీచేశామని తెలిపారు. అలాగే ఆస్పత్రి గుర్తింపు కూడా రద్దు చేస్తామని తెలిపారు. ఈ వ్యవహారంపై 24 గంటల్లో జిల్లా వైద్యాశాఖ అధికారికి నివేదిక ఇవ్వాలని ఆదేశించినట్టు చెప్పారు.
