మధ్యప్రదేశ్ రాష్ట్ర రాజధాని భోపాల్‌లో ఓ మహిళా వైద్యురాలు తన వైద్య క్లినిక్ కేంద్రంగా వ్యభిచారిణులతో అక్రమంగా వ్యభిచారం చేయిస్తూ వచ్చింది. ఈ విషయాన్ని పసిగట్టిన స్థానిక పోలీసులు.. ఓ లేడీ కానిస్టేబుల్‌తో ఈ వ్యభిచార రాకెట్ గుట్టును బహిర్గతం చేశారు.
తాజాగా వెలుగులోకి వచ్చిన ఈ వివరాలను పరిశీలిస్తే, భోపాల్ నగరంలోని బర్ఖేడి ప్రాంతానికి చెందిన గాయత్రి సింగ్ (52) అనే మహిళ వైద్య విద్యను అభ్యసించారు. యునానీ మెడిసిన్, సర్జరీలో డిగ్రీ చదివారు. ఆమె భోపాల్ నగరంలో అత్యంత రద్దీ ఉన్న ప్రాంతంలో సొంతంగా ఓ క్లినిక్‌ను ప్రారంభించారు.
అయితే, ఆమె వద్దకు రోగులు పెద్దగా రాకపోవడంతో డబ్బు సంపాదనకు అడ్డదారులు తొక్కింది. ఇందులోభాగంగా, క్లినిక్ మాటున వ్యభిచారిణులతో రాకెట్ నడుపసాగింది. ఈ రాకెట్ గురించి పోలీసులకు ఎలాంటి క్లూ లభించలేదు. బర్ఖేడ నివాసులు కొందరు క్లినిక్ మాటున వ్యభిచారం రాకెట్ నడుపుతున్నారని డీజీపీ వీకేసింగ్‌కు సమాచారం అందించారు. దీంతో డీజీపీ ఈ సమాచారాన్ని భోపాల్ క్రైంబ్రాంచ్ పోలీసులకు చేరవేశారు.
ఆ తర్వాత స్థానిక పోలీసులు ఈ క్లినిక్‌పై నిఘా వేసి... మారువేషంలో ఓ మహిళా కానిస్టేబుల్‌ను ఆమె వద్దకు పంపించారు. తనకు అత్యవసరంగా క్లినిక్‌లో ఉద్యోగం కావాలని వచ్చిన మహిళా కానిస్టేబుల్‌కు వ్యభిచారం చేయమని మహిళా డాక్టరు కోరింది. దీంతో మహిళా కానిస్టేబుల్ అందించిన సమాచారం మేరకు పోలీసు బృందం దాడి చేసి నలుగురు వ్యభిచారిణులు, ఆరుగురు విటులతో పాటు మహిళా వైద్యురాలిని కూడా అరెస్టు చేశారు.
