ఆర్జేడీ అధినేత లాలూ ప్రసాద్ యాదవ్‌కు బెయిల్ లభించింది. దాణా కుంభకోణంలో ఆయనకు జార్ఖండ్ కోర్టు బెయిల్ మంజూరు చేసింది. ఐదో గడ్డి స్కామ్‌ కేసులో దొరండ ట్రెజరీ నుంచి అక్రమంగా నిధులు మంజూరు చేశారనే ఆరోపణలు వచ్చాయి. ఈ కేసులో ఫిబ్రవరి నెలలో సీబీఐ ప్రత్యేక కోర్టు ఆయన్ను దోషిగా నిర్ధారించింది. మొత్తం రూ.139 కోట్లను ఆయన ట్రెజరీ నుంచి అక్రమంగా మంజూరు చేసినట్టు నిరూపితమైంది.
ఈ కేసులో తనకు విధించిన శిక్షను సస్పెండ్ చేయాలంటూ ఆయన దాఖలు చేసుకున్న పిటిషన్‌ను కోర్టు స్వీకరించింది. ఈ కేసులో ఆయన ఇప్పటికే శిక్షను పూర్తి చేశారని, అందువల్ల ఆయనకు బెయిల్ మంజూరు చేయాలని ఆయన తరపు న్యాయవాది ప్రభాత్ కుమార్ కోరారు. అయితే, లాలూ తరపు న్యాయవాది వాదనను సీబీఐ వ్యతిరేకించినప్పటికీ కోర్టు మాత్రం బెయిల్ మంజూరు చేసింది.
కాగా, ప‌శుగ్రాస కుంభ‌కోణానికి సంబంధించిన నాలుగు కేసుల్లో లాలూ ఇప్పటికే దోషిగా తేల‌గా ఐదో, తుది కేసులోనూ ఆయన అభియోగాలు ఎదుర్కొంటున్నారు. అవిభ‌క్త బిహార్‌లో ప్ర‌భుత్వ ట్రెజ‌రీల నుంచి అక్రమంగా విత్‌డ్రాయ‌ల్స్ జ‌రిగిన ఈ కేసులో రూ 950 కోట్లు చేతులు మారాయి.
ప‌శుగ్రాస కేసుల్లో లాలూ ప్ర‌సాద్‌కు 14 ఏండ్ల జైలు శిక్ష, రూ.60 ల‌క్ష‌ల జరిమానా విధించ‌గా నాలుగు కేసుల్లో ఆయనకు బెయిల్ లభించింది. 1996లో ప‌శుగ్రాస కేసు వెలుగుచూడ‌గా జూన్ 1997లో లాలూను సీబీఐ నిందితుడిగా చేర్చింది. లాలూతో పాటు బిహార్ మాజీ సీఎం జ‌గ‌న్నాధ్ మిశ్రాల‌పై సీబీఐ అభియోగాలు న‌మోదు చేసింది.
